Piktorët më të mirë shqiptarë,
ekspozitë dedikuar fëmijëve

Krijimtaria e përzgjedhur e katër artistëve Abdurrahim Buza, Agim Faja, Guri Bulollari dhe Ledia Kostandini, këtë herë u dedikohet në mënyrë të veçantë fëmijëve në një ekspozitë në Galerinë Kombëtare të Arteve.
 
E titulluar “Bota e fëmijëve në Galerinë Kombëtare të Arteve”, ekspozita i kushtohet krijuesve të vegjël.
 
Kuratorët Esmeralda Dalipi dhe Bujana Demiraj, shprehen se kjo ekspozitë vjen përpara publikut si një “ditar” me ilustrime të realizuara ndër vite, në teknika të ndryshme, nga autorë të specifikave të ndryshme.
 
Drejtori i Galerisë Kombëtare të Arteve, Artan Shabani e quan një mrekulli faktin që piktorët më të mirë shqiptarë kanë pasqyruar botën e fëmijëve

“Kjo është një ekspozitë që i dedikohet botës së fëmijëve në artin shqiptarë,  por dhe bota e fëmijës në pikturën Shqiptare, bota infantile tek adulti, është ajo botë jo e ndotur ajo botë e pastër e hapur e çiltër e kthjellë” tha  Shabani.

Ndërsa piktori autdidakt Guri Burollari rrëfen motivet që e kanë frymëzuar për veprat e kësaj ekspozite

“Fëmija më prek në kujtesë në pasionet që ka fëmija, fantazinë që ka fëmija, por duhet ta dishë ta trajtosh, duhet të kesh shumë kujdes, duhet të jesh shumë inteligjent.
Të gjithë njerëzit lindin engjëj por pse behën pastaj të ndryshëm kalojnë në rrugë të keqe, sepse nuk kanë edukatën dhe kujdesin prindërorë” tha Burollari.

Vepra e piktorit Abdurrahim Buza përballë veprës kapricioze të Guri Bulollarit, e bën këtë ekspozitë më të veçantë në komunikim tematik.
 
Më tej është prezantimi i krijimtarisë së Agim Fajës, ilustrues brilant dhe krijues i teksteve letrare për më shumë se 50 vjet në Shqipëri.
 
Fajës i njihen mbi 100 libra të ilustruar për fëmijë dhe të rritur. Përkrah tij gjenden veprat e Ledia Konstandinit, artiste e gjeneratës së re, e cila ilustron përmes mediumit të ri dixhital manual.
 
Të gjithë këta artistë të shquar të mbledhur së bashku në një ekspozitë në Galerinë Kombëtare të Arteve, bëhen një burim kurioziteti, jo vetëm për fëmijët, por për çdo moshë.

[gallery]22780[/gallery]

Redaksia Online
J.Sh Shqiptarja.com