TIRANË - Pavarësisht nisjes së diskutimeve për planet e reja rregulluese të 61 bashkive të reja, familjarët do të kenë mundësinë që të kërkojnë leje për të ndryshuar strukturën e banesës së tyre. Nëpërmjet një vendim të Agjencisë Kombëtare të Planifikimit të Territorit pronarëve të banesave private, apo dhe të atyre që kanë në pronësi një vilë në komplekset rezidenciale u lind e drejta që të kërkojnë shtesa në objekt.

Shtesat do të lejohen kur janë në mbështetje të vendimit 408 të vitit 2015 të Qeverisë. Me vendimin e AKPD lejohen lejet për “shtesa në banesa individuale/njëfamiljare ekzistuese duke respektuar kushtet urbane sipas vendimit të këshillit të ministrave nr 408, datë 13.05.2015, “për miratimin e rregullores së zhvillimit të territorit”. Ndërsa në një tjetër pikë hapet rruga dhe për subjektet që kanë një pronë në komplekset rezidenciale.