Plehrat e Piskovës derdhen në Vjosë, banorët: Nuk kemi kontejner, mbetjet urbane hidhen në lumë

Pirgje me mbeturina derdhen në shtratin e Vjosës, duke shënuar rekord ndotje. Pika më kritike është shënuar në Piskovës në Përmet. Në mungesë të kontejnerëve banorët i shkarkojnë mbeturinat urbane në këtë rrëpirë, të cilat më pas përfundojnë të gjitha në lumin e cilësuar si "perla e egër e Europës".

Ndotja masive e Vjosës duket se nuk ka shqetësuar kryebashkiaken e Përmet, Alma Hoxha, duke injoruar dhe planin kombëtar të qeverisë për pastrimin e territorit.

"Plehrat janë hedhur këtu se s'ka kosha që ti hedhin siç duhet. T'i vënë koshat këtu se kanë qenë 1 km larg qendrës së banuar. Nuk është vetëm ky vend ka shumë të tilla që hedhen kështu dhe përfundojnë në Vjosë, Kryetarja e Bashkisë nuk ka marrë masa për pastrimin e tyre dhe për vendosjen e koshave. Ka dhënë urdhër Rama por kryetarja e Bashkisë nuk e ka zbatuar".- thanë banorët.

LEXO EDHE:
Turistët e huaj vizitojnë Gjirokastrën, 4 mijë në 3 muaj e parë të vitit! Operatorët turistikë: S’ka punëtorë, do marrim nga Lindja e Mesme

Por banorët e Piskovës pranojnë se janë bashkëfajtorë, pasi disa kontejnerë që kohë më parë ishin vendosur në dalje të fshatit, tashmë janë shkatërruar.

"Këtu s'ka vend për kazanë se e kemi në derë të shtëpisë. Të vihen koshat se ne i kemi atje tej. Këto plehra 80 për qind është faji jonë dhe 20 për qind i bashkisë. Këto plehra kanë 30 vjet, se në kohën e Enverit nuk kishte. Koshat u vendosën aty tej por i hoqën njerëzit".- u shprehën ato.

Lumi Vjosë zë vend të rëndësishëm në jetën e përditshme të banorëve që jetojnë përgjatë brigjeve të tij për prodhimet bujqësore,  por keqmenaxhimi i mbetjeve bën që të dëmtohet ekosistemi dhe shumëllojshmëria e peshqve.

M.Q./r.k./Shqiptarja.com

TAG:
• Gjirokaster
• permet
• lumi vjosa
• Mbetjet