TIRANË- Sekretariati i Etikës ka rrëzuar kërkesën e Partisë Demokratike për përjashtimin e kreut të grupit të PS, Taulant Balla me 30 ditë nga Kuvendi.

Kërkesa e opozitës për përjashtimin e Ballës u bë pas debateve në seancën plenare të 11 dhjetorit, ku palët u përplasën për kandidaturën e Endri Shabanit si Avokat Populli.

Opozita pretendonte se Balla ka drejtuar fjalë jo të hijshme kundrejt tyre. Debati nisi pasi Sali Berisha në foltoren e Kuvendit e akuzoi Endri Shbanin si lepur të Surrelit, për të cilin opozita tërhoqi firmat dhe nuk e votoi si Avokat Populli.

Në kundërpërgjigje të kësaj deklarate, Balla akuzoi PD se ishte ajo që e nxori në “pritë” Shabanin, duke përdorur këtë frazë: "flisni për lepuj, por për folët për lepuj duhet të flisni edhe për zagarët, sepse lepurin e pritë e sjell zagari". 

Demokratët u revoltuan më shumë kur Flamur Nokës iu dha vërejtje për termin ‘injorant’ që përdori ndaj tij, ndërsa kur opozitarët kërkuan masë për Ballën, Niko Peleshi nuk ndërmori asnjë akt.