TIRANË- Policia e Shtetit në një njoftim për mediat thekson se  gjatë ditës së sotme, në bashkëpunim me OSHEE, ka vijuar në të gjithë vendin operacionin për identifikimin dhe vënien para drejtësisë  të autorëve të lidhjeve të paligjshme të energjisë dhe vjedhjes së energjisë elektrike.
Policia e Shtetit ben te ditur se "gjatë 24 orëve të fundit  janë arrestuar 25 persona, të cilët akuzohen për vjedhje të energjisë elektrike dhe shpërdorim detyre , si dhe janë shpallur në kërkim 7 persona të tjerë".
Policia e Shtetit konfirmon se "në bashkëpunim me  OSHEE-në  po vijon me intensitet të lartë veprimet në terren dhe nuk do ta ndërpresin në asnjë moment  punen deri në shkëputjen e fundit  të lidhjeve  të paligjshme të energjisë dhe për të  përballur me forcën e ligjit të gjithë ata persona që abuzojnë  me energjinë elektrike si dhe të gjithë ata punonjës të OSHEE që shpërdorojnë  detyrën me qëllim përfitimi  duke favorizuar   vjedhësit  e energjisë elektrike"./ATSh/