TIRANË, 17 Nëntor/ATSH- I. Vata/-Policia  e Shtetit në një deklaratë për mediat të hënën në orët e mbrëmjes, ka deklaruar se në bashkëpunim me  OSHEE, kanë vijuar  kontrollet e përbashkëta  në të gjithë vendin për të  identifikuar dhe vënë para drejtësisë  autorët e lidhjeve të paligjshme të energjisë dhe vjedhjes së energjisë elektrike.
Nga ky operacion, bën me dije Policia e Shtetit, gjatë 48 orëve të fundit  në të gjithë vendin kanë vepruar 196 grupe të përbashkëta  Polici - OSHEE dhe si rezultat i kontrolleve të kryera në terren, në abonentët biznese dhe familjarë,  janë arrestuar 16 persona, të cilët akuzohen për vjedhje të energjisë elektrike, si dhe janë shpallur në kërkim 15 persona.
Po ashtu, janë kryer kontrolle  të përbashkëta  me  OSHEE në  2.950  raste, si dhe janë ndërprerë 1.443  lidhje të paligjshme të energjisë abonenteve debitorë, si dhe është ushtruar kontroll edhe në zonat  e kontrolluara më parë, ku janë  konstatuar raste të riligjdhjes së paligjshme të energjisë elektike.
Statistika e Policisë së Shtetit tregojnë se "gjatë javës se fundit në të gjithë vendin janë arrestuar 108 persona  dhe janë shpallur në kërkim 38 persona. Nga analiza e statistikave të procedimeve penale konstatohet se nga të arrestuarit në të gjithë vendin, vetëm ndaj 41 prej tyre është marrë masa e sigurisë "Arrest në burg", për 7 të tjerë është marrë  masa e sigurise "Arrest shtëpie" dhe për  38 të tjerë është marrë masa e sigurisë "Detyrim paraqitje". Ndërsa për 22 të arrestuar nuk është marrë ende masa e sigurisë  nga Gjykatat. /a.ke/