/ATSH/. - Policia  e Shtetit, në bashkëpunim me  OSHEE, edhe gjatë ditës së sotme kanë vijuar  kontrollet e përbashkëta në të gjithë vendin për të  identifikuar  dhe vënë para drejtësisë  autorët e lidhjeve të paligjshme të energjisë dhe vjedhjes së energjisë elektrike.
Në të gjithë vendin kanë vepruar 121 grupe të përbashkëta  Polici - OSHEE. Si rezultat i kontrolleve të kryera në terren, në abonentët biznes dhe familjarë,  janë arrestuar 14 persona, të cilët akuzohen për vjedhje të energjisë elektrike dhe shpërdorim detyre, si dhe janë shpallur në kërkim 8 persona  të tjerë.
Janë kryer kontrolle   të përbashkëta Polici -  OSHEE në  2.018  raste, si dhe janë ndërprerë 1.134  lidhje të paligjshme të energjisë  dhe abonenteve debitorë. Janë ndaluar për shpërdorim detyre 3 punonjës të OSHEE  me detyrë elektriçist në qarkun Elbasan. Janë arrestuar  në flagrancë 4 pronarë biznesesh për rilidhje të paligjshme të energjisë  për herë të dytë.
Gjatë ditës së sotme janë kontrolluar 220 kabina elektike dhe abonentët që furnizohen me energji elektrike nga  këto kabina, si dhe janë ushtruar kontrolle edhe në kabinat e kontrolluara më parë, ku u konstatuan katër rilidhje të paligjshme për herë të dytë.
Grupet e përbashkëta Polici  e Shtetit -OSHEE, do vijojnë çdo ditë kontrollet kabinë më kabinë, tek çdo abonent biznes apo familjar si dhe do rikontrollojnë përsëri zonat e kontrolluara më parë. Asnjë prej  abuzuesve dhe  vjedhësve të energjisë elektrike nuk do t'i shpëtojë ndëshkimit të ligjit.