Negociatori kryesor tregtar i SHBA-së, Jamieson Greer, këmbënguli të dielën se politika e SHBA-së mbi tarifat doganore “nuk ka ndryshuar”, dy ditë pasi Gjykata Supreme i shpalli shumë nga tarifat e Donald Trump të paligjshme.

Vendimi i lëshuar të premten nga gjykata më e lartë amerikane ishte një qortim i ashpër ndaj presidentit republikan që rrëzoi një shtyllë kyçe të axhendës së tij agresive ekonomike -edhe pse e shtyu Trump të njoftonte një tarifë të re doganore duke përdorur statute të ndryshme, megjithëse të përkohshme.

“Realiteti është se ne duam të ruajmë politikën që kemi, të kemi sa më shumë vazhdimësi të jetë e mundur, të sigurohemi që bizneset e kuptojnë se ky është drejtimi që kemi ndjekur. Ne do të vazhdojmë të ecim në këtë mënyrë”, tha Greer për emisionin politik This Week të ABC News Sunday.

Prezantuesja e ABC-së, Martha Raddatz, e pyeti Greer-in rreth këmbënguljes së qeverisë pavarësisht mungesës së popullaritetit të politikës në publik, duke cituar një sondazh të ABC/Ëashington Post/Ipsos që tregoi se 64% e të anketuarve në SHBA nuk i miratuan tarifat doganore si një strategji ekonomike.

“Politika nuk ka ndryshuar. Mjetet ligjore që e zbatojnë atë mund të ndryshojnë, por politika nuk ka ndryshuar”, tha ai, duke argumentuar se kjo i jep biznesit amerikan “shumë ndikim” në tregtinë botërore.

Greer tha gjithashtu në një intervistë të veçantë me CBS se SHBA-të nuk do të tërhiqen nga marrëveshjet që kanë nënshkruar tashmë me një numër vendesh anembanë botës, përfshirë Mbretërinë e Bashkuar , BE-në, Japoninë , Zvicrën dhe të tjera, edhe pse gjykata supreme vendosi që tarifat e vendosura në ato marrëveshje ishin të paligjshme.

Ai tha se tarifa doganore prej 15% që Trump njoftoi të shtunën, nga 10% e njoftuar të premten menjëherë pas vendimit të gjykatës, ishte e ndryshme nga marrëveshjet dypalëshe të arritura në nëntë muajt e fundit me rreth 20 vende.

“Ne duam që ata ta kuptojnë se këto marrëveshje do të jenë marrëveshje të mira”, tha Greer. “Ne do t’i mbështesim. Presim që partnerët tanë t’i mbështesin.”

Greer pranoi në një intervistë me CBS të dielën se administrata do të kishte më pak fleksibilitet në vendosjen e tarifave doganore emergjente të llojit që u rrëzua nga gjykata si një përdorim i papërshtatshëm i një ligji për fuqitë emergjente të vitit 1977.

Udhëheqësi i pakicës në Senat, Chuck Schumer një demokrat, e quajti vendimin një fitore për konsumatorët amerikanë dhe një shembull se si "dështoi tejkalimi i Trump", duke shtuar: "Një president nuk mund ta injorojë Kongresin dhe të vendosë në mënyrë të njëanshme tarifa doganore për amerikanët... Tani Trump duhet t'i japë fund kësaj lufte tregtare të pamatur përgjithmonë dhe më në fund t'u japë familjeve dhe bizneseve të vogla lehtësimin që meritojnë."

Politika e Trump është hartuar për të penalizuar eksportuesit e vendeve të tjera dhe për të frymëzuar prodhuesit vendas dhe të huaj që të investojnë dhe të prodhojnë më shumë mallra brenda SHBA-së, por kritikët argumentojnë se konsumatorët amerikanë thjesht kanë përfunduar duke paguar më shumë .

Vendimi i Gjykatës Supreme e zemëroi Trumpin, i cili të shtunën njoftoi një tarifë doganore prej 15% për të gjitha importet e huaja, të hartuar sipas Seksionit 122 të Aktit të Tregtisë të vitit 1974, një kuadër ligjor i ndryshëm nga ai i hetuar nga Gjykata Supreme.

Në vendimin 6-3 të së premtes, me tre gjyqtarë me prirje konservatore që nuk ishin dakord, gjykata vendosi që një ligj i vitit 1977 i hartuar për të adresuar emergjencat kombëtare të SHBA-së nuk ofronte justifikimin ligjor për shumicën e tarifave doganore të administratës Trump .

Tarifat doganore zakonisht duhet të miratohen nga Kongresi, i cili ka autoritetin e vetëm sipas kushtetutës për të vendosur taksa. Trump argumentoi se ai kishte të drejtë të vendoste tarifa doganore mbi partnerët tregtarë sipas Aktit Ndërkombëtar të Fuqive Ekonomike të Emergjencës, ose IEEPA, i cili në disa rrethana i jep presidentit autoritetin për të rregulluar ose ndaluar transaksionet ndërkombëtare gjatë një emergjence kombëtare.

Por në mendimin e shumicës, gjykata tha se aftësia për të miratuar tarifa doganore gjatë kohës së paqes në fakt i përket Kongresit.

Greer tregoi se administrata nuk do të kërkonte automatikisht autorizimin e Kongresit për tarifat e reja doganore të cilat janë të destinuara të skadojnë brenda pesë muajsh pa të.

Greer i tha gjithashtu ABC se administrata do ta lërë çështjen e rimbursimeve për tarifat e vendosura deri më tani në dorë të gjykatës së tregtisë ndërkombëtare. Ai tha se gjykata supreme kishte "krijuar një situatë ku ata i rrëzuan tarifat doganore dhe nuk dhanë asnjë udhëzim për këtë".

Më vete, sekretari i thesarit Scott Bessent tha se administrata do të presë një udhëzim nga një gjykatë më e ulët mbi temën e rimbursimeve mbi koston e tarifave doganore deri më tani për bizneset amerikane.

“Presidenti dhe administrata mbeten të palëkundur në lidhje me ri-vendosjen e fabrikave amerikane dhe eliminimin e çekuilibrave masive tregtare”, tha Bessent për CNN në emisionin “State of the Union”. “Kjo është historia e madhe këtu. Do të kalojmë menjëherë te tarifat e Seksionit 122 dhe parashikimet e të ardhurave për thesarin amerikan për vitin 2026 mbeten të pandryshuara.”

Gjithashtu në CNN, guvernatori i Kalifornisë, Gavin Neësom, sulmoi politikën e Trump, duke thënë se "e gjithë kjo është një farsë".

“Flisni për inatin… ishte 10% dy ditë më parë dhe ndoshta 20% nesër. Kjo është çmenduri. Ai po lëkundet. Është një boksier i dehur nga grushtet. Ai thjesht po përpiqet të godasë çdo gjë, madje edhe hijen e tij”, tha Newsom./The Guardian