Prerja e pyjeve, Koka: Kemi
bërë 200 kallëzime penale

TIRANE- Ministria e Mjedisit vetëm gjatë këtij viti ka bërë mbi 200 kallëzime penale ndaj kompanive që kanë bërë masakër në pyjet shqiptare, duke mos respektuar asnjë kriter ligjor. Ndërkaq janë vendosur me qindra gjoba, dhe janë sekuestruar vetëm muajt e fundit rreth 2000 metër kub dru. Ministri i Mjedisit Lefter Koka u shpreh se janë marë edhe masa të tjera për mbrojtjen e pyjeve në veçanti në këtë periudhë të vitit, ku pyjet shfrytëzohen edhe për ngrohje. "Kemi çuar për ndjekje penale 200 kompani apo individ, kjo ka qenë e detyruar nga ana jonë.

Kemi vendosur mbi një mijë gjoba, masa administrative dhe kjo nuk është qëllimi ynë po ka qenë e detyruar. Kemi ndaluar eksportin e qymyrit dhe drurit për zjarr, kemi sekuestruar dy mijë metra kub dru. Dhe të kuptohemi, janë vetëm 120 inspektorë të pyjeve në gjithë territorin shqiptar, një numër aq i vogël, aq absurd për tu kuptuar nga çdo shtetas evropian", tha ministri Lefter Koka. Ndërkaq ministri i Mjedisit ka shpallur edhe planin kombëtar të zhvillimit të gjuetisë pasi në këto 23 vite fauna shqiptare ka pësuar dëmtime të rënda nga gjuetia pa kriter.

Ndaj për herë të parë Ministria e Mjedisit ka realizuar një plan kombëtar për zhvillimin e gjuetisë, për të përmirësuar sadopak ketë situate. Sipas Kokës sektori i mjedisit kërkon më shumë kohë për marrjen e rezultateve, ndaj do të ketë disa ndryshime të rëndësishme për natyrën e biodiversitetit. Sipas kreut të Ministrisë së Mjedisit tashmë është vendosur një kuotë për të gjithë ata që do të gjuajnë në zonat e lejuara e  nga ana tjetër ka paralajmëruar ngritjen e dy fermave për kultivimin e specieve si objekt gjuetie.

"Mbi bazën e të dhënave që dalin nga inventarizimi vjetor i ligjit për gjuetinë është sanksionuar se kuota e planifikuar për të gjuajtur pas moratoriumit në sezonin e ardhshëm të gjuetisë nuk mund të jetë më shumë se 10 për qind e shtesës natyrale të popullatës për secilin prej llojeve të faunës së egër objekt gjuetie. Për ripopullimin e zonave të gjuetisë planifikohet që nëpërmjet financimeve nga buxheti dhe atyre të huaja të ngrihen dy ferma për kultivimin e specieve, objekt gjuetie deri në 2018 për planifikimin e rritjes dhe mbarështimit të llojeve objekt gjuetie", vijoi Koka. Programi kombëtar i zhvillimit të gjuetisë do të zbatohet për një periudhë dhjetë vjeçare. 


Shkrimi u botua në Shqiptarja.com (print) në 5 Nëntor 2014

Redaksia Online
(d.a/shqiptarja.com)