Konferenca në Tiranë, Rama: Antisemitizmi virus, mund të kurohet vetëm nëse kryhet një diagnozë e saktë

Kryesia Shqiptare e OSBE-së organizoi në Tiranë, Konferencën e nivelit të lartë mbi Luftën kundër Antisemitizmit në rajonin e OSBE-së. Në të morën pjesë delegacione zyrtare nga vendet pjesëmarrëse të OSBE-së, përfaqësues të organizatave ndërkombëtare dhe shoqërisë civile, etj.

“Kjo konferencë është një thirrje për të qenë vigjilentë”, theksoi kryeministri dhe Ministri për Evropën dhe Punët e Jashtme, Edi Rama në video mesazh. Ai u drejtoi një thirrje konkrete vendeve pjesëmarrëse që së bashku me shoqërinë civile të veprojnë për të adresuar sfidat e antisemitizmit në rajonin e OSBE-së. “Antisemitizmi është si një virus dhe si gjithë sëmundjet mund të kurohet vetëm nëse kryhet një diagnozë e saktë” tha Rama.

Sipas njoftimit të zyrës së shtypit të ministrisë së Jashtme, në sesionin e hapjes së Konferencës e mori fjalën edhe zëvendësministri për Evropën dhe Punët e Jashtme, Agron Tare i cili, ndër të tjera bëri të ditur se, Shqipëria përgjatë vitit të Kryesisë do të jetë e angazhuar në promovimin e tolerancës dhe mos diskriminimit.

Gjithashtu, Tare u ndal në kontributin shqiptar pёr shpëtimin e hebrenjve gjatë Luftës së Dytë Botërore.

 Në vijim, ai u shpreh se "secili shtet pjesëmarrës mund kontribuojë dhe japë mbështetjen e tij në identifikimin e masave për adresimin e manifestimeve të dhunshme antisemitizëm si dhe të kontribuojë në luftën kundër antisemitizmit, intolerancës, ksenofobisë, racizmit, etj, për një të ardhme më të sigurt për të gjithë rajonin e OSBE-së". Konferenca e nivelit të lartë shënon aktivitetin e parë të këtij lloji të Kryesisë Shqiptare.

TAG:
• OSBE
• presidenca e OSBE
• Antisemitizmi