Presidenti I Kosovës Hashim Thaçi ka kërkuar nga BE që të diskutohet njohja reciproke

Presidenti i Kosovës, Hashim Thaçi, në një konferencë për media pas takimit me të dërguarin e BE-së, Miroslav Lajçak, ka thënë se në takim kanë diskutuar për mundësinë e arritjes së një marrëveshjeje finale mes Kosovës dhe Serbisë e cila do të nënkuptonte njohjen reciproke.

“Përfundova një takim me të ngarkuarin e BE-së për dialogun Kosovë-Serbi Miroslav Lajçak. Mund të konkludoj se takimi në përgjithësi ka qenë një takim korrekt konstruktiv, një bisedë e hapur dhe miqësore në drejtimin e gjetjes së mundësive për arritjen e marrëveshjes finale mes Kosovës dhe Serbisë, që do të nënkuptonte njohjen reciproke si dy shtete të pavarura dhe me mundësinë që Kosova të anëtarësohet në OKB. Unë vazhdoj të besoj fuqishëm që e ardhmja e Kosovës është të jetë pjesë e NATO-s dhe BE-së. Gjithashtu, besoj fuqishëm që ka ardhur momenti që BE-ja të hedhë në tavolinë marrëveshjen për njohjen reciproke dhe jo të vazhdojë me dialog teknik”, tha Thaçi. 

Një tjetër pikë diskutimi mes palëve ishte çështja e liberalizmit të vizave për Kosovën.  

 “BE-ja duhet të lëvizë sa më shpejt në çështjen e liberalizimit të vizave, sepse janë vonuar dhe po ndodh padrejtësisht ndaj qytetarëve të Kosovës. Vetëm njohja reciproke mund të jetë mundësia e vetme që garanton stabilitetin në rajon dhe fqinjësinë mes dy shteteve", tha presidenti. 

I dërguari special për dialogun Kosovë-Serbi ditën e djeshme u takua edhe me kryeministrin Avdullah Hoti ku u diskutua për Asociacionin e komunave serbe në Kosovë.

TAG:
• kosova
• kosova
• kosova
• kosova
• BE
• serbia
• Dialogu Kosovë Serbi