Presidenti Meta ktheu për rishqyrtim në Kuvend ligjin për TVSH, pjesë e Paketës Fiskale! Komisioni i Ekonomisë ia rrëzon pas 2 orësh

Ndryshimet e miratuara nga Kuvendi në ligjin  “Për tatimin mbi vlerën e shtuar në Republikën e Shqipërisë”, janë kthyer nga Presidenti Ilir Meta. Sipas Metës ky ligj lejon trajtim fiskal të diferencuar, që në thelb shkel parime e të drejta themelore kushtetuese për mbrojtjen e të cilave Presidenti i Republikës, ka vendosur kthimin e këtij ligji për rishqyrtim.

"Për ilustrim, për subjektet që operojnë në fushën e turizmit argëtues, sportet ujore etj., nuk i është hequr përjashtimi nga TVSH për mjetet lundruese për qëllime turistike dhe argëtim, apo heqja e shkallës së reduktuar për aktivitete dhe sektorë të tjerë.  Pra këto subjekte mbeten të favorizuara përmes përjashtimit nga TVSH.  Kjo do të thotë se, këto subjekte që operojnë në shitjen dhe tregtimin e mjeteve lundruese ngelen të favorizuara, ndërkohë që sektorë të veçantë të ekonomisë me më shumë nevojë, diferencohen dhe mbahen në presion fiskal të diferencuar dhe jo proporcional me nevojën që dikton mbështetja e tyre. Ndërkohë që, në përjashtimet e veçanta në import për makineritë dhe pajisjet, kufiri përpara këtyre ndryshimeve ligjore ishte në një vlerë mbi 50 milionë lekë. Ndërsa me ndryshimet ligjore, kemi 10-fishim të vlerës së kufirit minimal mbi të cilën vihet në zbatim përjashtimi përmes këtij ligji. Rritja e këtij kufiri, penalizon dhe rëndon mbi subjekte që zhvillojnë aktivitetin në këtë fushë. Përjashtimet nga zbatimi i regjimit ligjor fiskal, në mënyrë të diferencuar, rrezikojnë qëndrueshmërinë e vetë ligjit bazë për tatimin mbi vlerën e shtuar", thuhet në argumentimin e Metës.

Ndërkohë, Meta ktheu për rishqyrtim ndryshimet në ligjin për “Për taksat kombëtare”. Vetëm pak orë pasi i ktheu, Komisioni i Ekonomisë dhe Financave rrëzoi dekretin e presidentit për kthimin e ligji për TVSH-në dhe atë “Për taksat kombëtare”. Sakaq, Komisioni i Ekonomisë rrëzoi edhe dekretin e Metës për “Buxhetin 2022”, të cilin ai e kishte kthyer një javë më parë.

Sa i takon Paketës Fiskale, ndryshon ligji për TVSH-në, ku hiqet kompensimi 6% për fermerët, rivendoset taksa 10% për inputet bujqësore dhe vendoset tavan i ri për investimet në bujqësi që përjashtohen nga pagesa e TVSH-së. Vetëm nga ndryshimet fiskale të propozuara qeveria ka deklaruar se pret që të mblidhen 5.2 miliardë lekë dhe të rritet formalizimi i ekonomisë.

Kujtojmë se më 10 dhjetor Presidenti Meta ka rikthyer për rishqyrtim në Kuvend ligjin për 'Buxhetin 2022', duke e konsideruar atë 'plan financiar antisocial'.  Sipas Metës, 'Buxheti 2022' ka mangësi të transparencës në lidhje me shpenzimet dhe politikat sociale si dhe paraqet problematikë shumë shqetësuese në lidhje me nivelin e borxhit publik. Buxheti 2022 u miratua në Kuvend me 77 vota pro dhe 46 kundër më 25 nëntor të këtij viti dhe parashikon që të mblidhen 536.8 miliardë lekë dhe të shpenzohen 637.6 miliardë lekë. 

(Kliko këtu për dekretin e kthimit të ligjit për TVSH)

 

(Kliko këtu për arsyet e kthimit të ligjit për TVSH)

Rendit zhvillimet sipas orarit:

Të Fundit Të Parat

K.T./SI.E./Shqiptarja.com

TAG:
• Ilir Meta