PRISHTINË, 3 Shkurt /ATSH-B.Jashari/.-Presidentja e Republikës së Kosovës, Atifete Jahjaga, priti sot në takim  ministrin e Drejtësisë së Republikës së Shqipërisë, Nasip Naço.
Presidentja Jahjaga dhe ministri Naço e vlerësuan bashkëpunimin ndërmjet institucioneve të Republikës së Kosovës dhe të Republikës së Shqipërisë dhe theksuan nevojën e zgjerimit të këtij bashkëpunimi në veçanti në fushën e sundimit të ligjit dhe të rendit dhe në përgjithësi ndërmjet institucioneve të drejtësisë të të dyja vendeve.
Presidentja Jahjaga u shpreh se "prioritet për institucionet dhe qytetarët e Republikës së Kosovës është sundimi i rendit dhe ligjit si dhe luftimi i krimit të organizuar e korrupsionit. Ajo theksoi se suksesi në këtë fushë do të ndihmojë zhvillimin e përgjithshëm të vendit si dhe do të përshpejtojë procesin e integrimit të Kosovës në Bashkimin Evropian".
Ndërsa, ministri i Drejtësisë i Republikës së Shqipërisë, Nasip Naço, vlerësoi reformat që i kanë bërë institucionet e drejtësisë në Kosovë dhe shprehu gatishmërinë e Qeverisë së Shqipërisë për të thelluar bashkëpunimin me institucionet e Kosovës në të gjitha fushat me interes dypalësh./i.v//a.ke/