Masat anti-COVID nga Italia, 100 qytetarë bllokohen në aeroportin e Prishtinës

Rreth 100 qytetarë nga Kosova nuk janë lejuar sot që të udhëtojnë drejt Italisë, ka njoftuar zëdhënësja e Aeroportit Ndërkombëtar të Prishtinës “Adem Jashari”, Valentina Gara. Ajo tha se qytetarët janë ndaluar për shkak të masave të reja nga qeveria italiane, si masa mbrojtëse nga COVID-19.

“Ne vazhdimisht kërkojmë nga udhëtarët që para se të udhëtojnë t’i referohen rregullave të fundit të shtetit për ku ata udhëtojnë. Udhëtarët të cilet sot (17 dhjetor) nuk janë lejuar të regjistrohen në sportel, është për shkak të ndalesave të reja të shtetit italian, të cilat janë edhe të publikuara në web faqën zyrtare të Ambasadës së Italisë në Kosovë”, tha Gara.

Gara shtoi se udhëtarët çdo ankesë të tyre duhet ta dërgojnë në kompaninë ajrore me të cilën kishin planifikuar udhëtimin. Qytetarët e Kosovës, nga janari i vitit të ardhshëm, mund të mos lejohen të udhëtojnë në vendet e Bashkimit Evropian, pasi blloku nuk i njeh ende certifikatat e vaksinimit kundër koronavirusit, të lëshuara në Kosovë. Kosova, bashkë me Bosnje e Hercegovinën, mbeten dy vendet e vetme të Ballkanit Perëndimor, të cilave BE-ja nuk ua njeh certifikatat e vaksinimit.

Sa i përket situatës pandemike, Kosova vijon të ketë shifra të qëndrueshme infektimesh dhe viktimash. Gjatë 24 orëve të fundit në Kosovë janë regjistruar 11 raste të reja me koronavirus ndërsa ashtu si prej disa ditësh nuk është shënuar asnjë viktimë nga koronavirusi.

TAG:
• kosove
• prishtine
• itali
• masat anticovid