Amnistia Penale, Gogu: Do të ndodhë patjetër, presim vlerësimin e Komisionit Europian! Transmetimi live i seancave, ministri: Besoj te profesionalizmi i gjyqtarëve

Ministria e Drejtësisë është në pritje të draftit të Kodit të ri Penal për ta konsultuar më pas me ekspertët ndërkombëtarë. Në këtë Kod, parashikohet trajtimi i krimit ekonomik, pastrimit të parave, proporcionalitetit dhe mbrojtjes së të drejtave të njeriut.

“Në proces kemi disa ligje të rëndësishme që u shërbejnë objektivave strategjike siç është Kodi Penal, jemi në fund të tij, presim nga grupi i punës të marrim draftin dhe ta konsultojmë me ekspertët ndërkombëtarë. Kodi Penal do të siguronte që krimi ekonomik të ketë vëmendjen e duhur, pastrimi i parave, proporcionaliteti penal dhe mbrojtja e të drejtave të njeriut”, tha Gogu.

I pyetur për komentet se Kodi i ri është shumë i ashpër, ministri u shpreh se duhet parë si përkon versioni përfundimtar me realitetin.

“Duhet të shikojmë versionin përfundimtar dhe mbi të të shikojmë nëse është Kodi Penal që i përgjigjet realitetit tonë shtetëror, juridik e me radhë”, tha ai.

Edhe pse të pandehurit, mes tyre Ilir Meta, Erion Veliaj apo Ilir Beqaj kanë kërkuar transmetimin live të seancave gjyqësore, vetë gjykatat kanë refuzuar duke lejuar kamerat vetëm për pak minuta. Lidhur me çështjen, ministri i Drejtësisë, Toni Gogu, tha se s’ka kërkuar sqarime për këtë duke besuar te vendimmarrja e pavarur e institucioneve të drejtësisë dhe gjykimit të gjyqtarit.

“Nuk kam kërkuar sqarim sepse besoj që vendimmarrja e gjykatës është tërësisht e pavarur dhe besoj në maturitetin dhe profesionalizmin e çdo gjyqtari shqiptar për të garantuar drejtpeshimin e parimit të një seance publike që parashikohet në kodet tona të procedurës dhe sigurisë së procesit që duhet drejtpeshuar dhe këtë e bën vetëm gjyqtari. Mund të ketë mendime, por nuk mund të komentoj. Çmon gjyqtari gjithmonë si drejtpeshon transparenca dhe siguria e një procesi duke siguruar që palët mos të humbasin dhe mos t’u mohohet asnjë e drejtë brenda procesit. Është tjetër gjë kur flasim për transmetim direkt dhe tjetër për prani të gazetarëve brenda saj”, tha Gogu.

Amnistia Penale është në pritje të vlerësimit nga Komisioni Europian dhe menjëherë më pas, do të nisë diskutimi i saj në parlament, tha ministri Gogu duke siguruar se “do të ndodhë, patjetër.”

“Është një instrument i politikës sonë penale që u dizenjua për të adresuar disa problematika, në radhë të parë fuqizimin e të drejtave të njeriut dhe kjo ka të bëjë me situatën që kemi me popullimin në burgje. Do të ndodhë, patjetër. Jemi treguar shumë të kujdesshëm që në të gjithë procesin që kemi të avancimit të vendit drejt anëtarësimit, t’i shqyrtojmë prioritetet sipas rëndësisë. Amnistia është në parlament. Pasi të kemi marrë vlerësimin për ‘Themeloret’, do të fillojmë të merremi me amnistinë, me vëmendjen që i takon. Në ditët në vijim, besoj që do të fillojë diskutimi në parlament”, tha Gogu.

Janë rreth 12 mijë ata që presin të përfitojnë nga miratimi i amnistisë, disa qindra të burgosur që presin lirim, rreth 1000 që presin ulje dënimi, mijëra që presin të lirohen nga shërbimi i plorës apo edhe miraja të tjerë që u shuhet ndjekja penale.

Mbipopullimi i burgut të Shënkollit ku ndodhen edhe të dënuar që vuajnë nga shëndeti mendor do të adresohet nga Ministria e Drejtësisë me përmirësimin e kushteve. Lajmin e dha ministri Toni Gogu gjatë konferencës me gazetarët.

“Jemi në mes të punës për përmirësimin e ndjeshëm të kushteve në Shënkoll, Lezhë ku janë persona me trajtim të detyrueshëm mjekësor, që vuajnë nga shëndeti mendor sepse është e patolerueshme. Ne s’mund të vazhdojmë ta ofrojmë atë shërbim siç kemi bërë deri tani. Jemi në diskutime të avancuara që atë shërbim ta ofrojë Ministria e Shëndetësisë dhe sigurinë Ministria e Drejtësisë. Të dënuarit që vuajnë nga shëndeti mendor janë në vëmendjen tonë. Jemi duke punuar. Shumë shpejt do të kemi rezultate konkrete që institucioni në Shënkoll të plotësojë standardet”, tha Gogu.

Sot, Avokati i Popullit rekomandoi mbylljen e 5 burgjeve: Burrel, Kosovë-Lushnjë, Kukës “Mine Peza” (302) dhe “Jordan Misja” (313), pasi sipas tij, nuk plotësojnë kushtet.