PROFILI i një politikani NDRYSHE që befasoi Kosovën! Emigranti arkitekt që do ‘projektojë’ Prishtinën

Kosovarët besojnë se zbriti me “parashutë”. Me këtë duan të thonë se ishte befasia më e madhe.

Por Përparim Rama, i cili do të drejtojë Prishtinën për 4 vitet e ardhshme, nuk ishte zbulim i rastësishëm. Lobimet për të nisën herët, prisnin vetëm mundësinë. LDK u pa e përshtatshme. Fjala ishte për t’i dhënë imazh tjetër partisë, pas disfatave vitet e fundit, një kohë e artë për arkitektin.

Lumir Abdixhiku kryetari i LDK, pas një vizite në Londër, kthehet në Prishtinë me emrin e Përparim Ramës për kandidat në zgjdhjet vendore. “Në fillim askush nuk verejti, dhe pak kush besonte në fitoren e tij”, tregon një gazetar me emër në Prishtinë.

Vetë Rama afroi rreth vetes në fushatë, të njohurit e tij në LDK por jo të konsumuar politikisht. Më shumë teknicienë, një prej tyre shefi i Shtabit Alban Zogaj, ekonomist i zoti.

“Ai nuk ka pranuar asnjëherë të jetë pjesë e LDK, dhe as ka folur në emër të partisë. Ka premtuar një Prishtinë sipas ideve të tij, një qytet unik në rajon, që të mos ngjajë me Tiranën, Shkupin apo Podgoricën”, thonë në LDK.

Shumë figura qendrore të kësaj partie, vetë Abdixhiku apo Fatmir  Sejdiu u panë rrallë krah tij. “Në debatet e para televizive kishte pak vështirësi, por shpejt u shfaq me profilin e një politikani që dinte çfarë po kërkonte’, tregon drejtuesi i një emisioni politik televeziv.

Shënjestër e sulmeve të tij në fushatë ishte Albin Kurti, kurse me Arben Vitinë, rivalin e tij për Prishtinën e trajtoi edhe shok.

 Bashkë me bashkëshorten e tij Kristale Ivezaj, në 10-vjecarin e fundit spikatën mes komunitetit shqiptar në Londër. Ai një arkitekt, ajo artiste, u afirmuan shumë shpejt në qarqet angleze, edhe pse Rama kaloi kufijtë e Kosovës, pas 90-s.  

Sot shikohet si një nga djemtë jo vetëm inteligjent por edhe më simpatikë në Kosovë.  Gazetarët vendas e cilësojnë të ftohtë si natyrë, por një figurë shprese.

Djal i një piktori më emër, 16 vjec u largua nga Kosova. “Emri im është Përparim Rama dhe unë kërkova azil në Britaninë e Madhe në vitin 1992. Jeta në Kosovë nuk ishte aspak e lehtë.”, ka treguar Përparim Rama për CNN. 

Në Londër, pas studimeve për arkitekturë, ngriti edhe një kompani për arkitekturë dhe dizajn, i vlerësuar me disa cmime. Në anën tjetër, Kristale, edhe ajo një grua e bukur, themelon “The Balkan Artists”, një burim novator i artit, galeri pop-up dhe platformë online, e cila promovon dhe mbështet artistët nga rajoni më i gjerë i Ballkanit. 

Në CV-në e tij thuhet se ka përvojë mbi 20 vjet në projekte të ndryshme në banesa e hotele, më parë ka punuar si këshilltar në Aeroportin e Southampton.

Rama është prezantues i rregullt në konferenca ndërkombëtare. Ai prezantoi në fjalimet e TEDx në Prishtinë, Kosovë dhe Tiranë, Shqipëri mbi ndikimin e mjedisit të ndërtuar në sjelljen njerëzore.

Çifti janë prindër të tre fëmijëve: Arrës, Tigrit dhe Bronit dhe jetojnë familjarisht në Londër të Mbretërisë së Bashkuar. ‘Do të jem kryetar i cili do të mbahet në mend për projekte infrastrukturore të mëdha e të guximshme, të cilat do ta zhvillojnë Prishtinën për dekadat e ardhshme”, ka thënë Rama.

Rendit zhvillimet sipas orarit:

Të Fundit Të Parat

G.M./M.Q./Shqiptarja.com

TAG:
• perparim rama
• Prishtina
• LDK