Progni: Kryebashkiaku
goditi anëtarin tim elektoral

GRAMSH-  Kandidatja për deputete e PD në Gramsh Irena Progni mbajti një konferencë për shtyp e shoqëruar nga një anëtar i stafit të saj, i dhunuar nga Kryetari i Bashkisë Gramsh dhe një grup familjarësh të tij dhe militantësh të PS.

Ajo deklaroi se PD në Gramsh po bën një fushatë të qetë e qytetare duke u bazuar në konkurrencën ndërmjet platformave dhe projekteve. Progni u shpreh se incidenti i krijuar dje në Gramsh është shenjë nervozizmi e kundërshtarëve politikë dhe i ftoi ata të bëhen pjesë e qytetarisë gramshiote e të zhvillojnë një fushatë të bazuar në ide dhe alternativa. Njëherësh ajo nënvizoi se dhuna e konfliktet nuk i shërbejnë fushatës elektorale, zgjedhjeve të lira e demokratike, madje mbi të gjitha nuk i shërbejnë Gramshit. “Flamujt s’janë çështje e militantëve dhe punonjësve të bashkisë dhe nëse do kishte ndonjë pretendim apo problem, Bashkia mund të kishte bërë kërkesë zyrtare për lëvizjen e tyre”, tha kandidatja Progni. “Heqja forcërisht e tyre nga militantët e PS-së nuk ishte rruga e duhur për të zgjidhur mosmarrëveshjen e krijuar”, shtoi ajo.

“Ne jemi të vendosur të zhvillojmë zgjedhje të lira dhe të ndershme. Ne e kemi bazuar fushatën tonë tek respekti reciprok dhe dashuria për qytetarin dhe do të vazhdojmë në këtë rrugë për tu shpjeguar gramshiotëve programin e Partisë Demokratike për Gramshin e zhvilluar, për Shqipërinë e zhvilluar”, përfundoi Progni. Ndërsa anëtari i stafit të saj, Ardit Zeneli u shpreh se ai ishte goditur nga Kryetari i Bashkisë me një grup militantësh e njerëz të afërt të tij. Ai ka depozituar padinë penale në polici dhe incidenti i është raportuar OSBE-ODIHR-it.

Redaksia online
(sg/shqiptarja.com)

TAG:
• OSBE
• OSBE-ODIHR