Programi i PD-së, Vokshi: Do ndryshojmë arsimin për fëmijët shqiptarë pas 25 prillit! Do u sigurojmë tekste shkollore falas

Ish-deputetja e PD-së njëkohësisht dhe një nga bashkëhartueset e programit për arsimin, Albana Vokshi ka shpjeguar se si do të ndryshojë arsimi për fëmijët shqiptarë nëse ata do të fitojnë zgjedhjet e 25 prillit.

Përmes një videomesazhi, ajo tha se PD do angazhohet për 350 mijë fëmijë për t’i siguruar tekste të reja falas, ndihmë e cila do të vijojë për 60 mijë familje deri në fund të shkollës së mesme.

Sipas saj, PD do të sigurojë dhe vakte ngrënie dhe aktivitete të ndryshme pas mësimit bazuar në prirjet e nxënësve.

“Patjetër që do ndryshojë. Nxënësi do jetë në fokus të programit të Partisë Demokratike. Të gjitha shkollat, edhe në cepin më të fundit të Shqipërisë, do jenë me infrastrukturë, me standarde ndërkombëtare. Prindërit, sikurse po e diskutonim dhe me Valbonën dhe me Malvinën do jenë krejt të qetë sepse fëmijët e tyre do jenë në një ambient të sigurt. Do sigurojmë edhe vakte ngrënie, madje edhe aktivitete të ndryshme mbas mësimit, bazuar në prirjet që nxënësit do të kenë. Përveç faktit që prindërit do jenë të sigurt për fëmijët e tyre, deri në orët e pasdites dhe do të kenë mundësi që të punësohen, që do të sjellin më shumë të ardhura për familjet e tyre. Partia Demokratike angazhohet që për 350 mijë fëmijë, të sigurojë tekste të reja falas. Ndihmë e cila për 60 mijë  familje në nevojë do të vazhdojë deri në fund të shkollës së mesme” – tha Vokshi.

PD prezantoi programin e saj me 11 pika për arsimin ditën e djeshme ku kryedemokrati Basha fokusin e ka vendosur në rritjen e pagave të mësuesve dhe pedagogëve, përftimin e bursave për studentët nga familje me të ardhura nën 64 mijë lekë dhe tekstet shkollore falas për 350 mijë nxënës.

 

E.M./r.k./Shqiptarja.com

TAG:
• PD
• Albana Vokshi
• zgjedhjet parlamentare 2021
• programet politike 2021