TIRANE-  Një muaj nga prezantimi i raport progresit të KE-së për marrjen e statusit të vendit kandidat, ministri i Punëve të Jashtme, Edmond Panariti, niset për një vizitë dyditore në Bruksel, ku do të zhvillojë një sërë takimesh me zyrtarë të lartë të Komisionit dhe Parlamentit Evropian.

Sipas zyrës së shtypit të Ministrisë së Jashtme, gjatë kësaj vizite Ministri Panariti do të takohet me Komisionerin për Çështjet e Zgjerimit, Stefan Fyle, Zv. Presidentin e Parlamentit Evropian, Gianni Pittella, Presidentin e Komisionit të Politikës së Jashtme në PE, Elmar Brok, Kryetarin e Delegacionit të Evropës Juglindore në PE, Eduard Kukan dhe me Presidentin e grupit parlamentar socialdemokrat në PE, Hannes Svoboda.

Në qendër të takimeve që Ministri Panariti do të zhvillojë me zyrtarët të lartë të BE-së do të jenë diskutimet mbi zhvillimet politike në vend, ecuria e procesit të plotësimit të 12 Prioriteteve të Komisionit Evropian, zhvillimet në rajonin tonë etj.

Gjatë qëndrimit në Bruksel, Ministri Panariti do të marrë pjesë në një konferencë të organizuar nga 'European Policy Center' (EPC) mbi procesin e integrimit të Shqipërisë.
(sg/shqiptarja.com)