Protestat në Iran/ Qytetarët të frikësuar: Regjimi do të marrë hak! Trump: Vrasjet janë ndalur

Në një deklaratë të përbashkët, vendet e G7 dhe shefi kryesor i politikës së jashtme të Bashkimit Evropian thanë se ishin thellësisht të shqetësuar nga zhvillimet në Iran, duke paralajmëruar për sanksione të tjera.

Ministrat e jashtëm të Kanadasë, Francës, Gjermanisë, Italisë, Japonisë, Mbretërisë së Bashkuar, SHBA-së deklaruan se kundërshtojnë fuqimisht intensifikimin e shtypjes brutale të popullit iranian nga autoritetet iraniane.

Donald Trump e mirëpriti lajmin se protestuesit iranianë, si Erfan Soltani, i riu nga Teherani që kishte frikë se do të ekzekutohej, nuk do të dënoheshin me vdekje.

"Protestuesi iranian nuk do të përballet më me dënimin me vdekje pas paralajmërimeve të Presidentit Trump. Dhe kështu do të ndodhë edhe me të tjerët. Ky është një lajm i mirë. Le të shpresojmë se do të vazhdojë kështu", shkroi Trump në Truth Social.

Portugalia njoftoi të enjten një mbyllje të përkohshme të ambasadës së saj në Teheran dhe i këshilloi shtetasit e saj të mos udhëtojnë në Iran.

Ministria e Jashtme e Portugalisë tha në një deklaratë se tetë shtetas portugezë ishin larguar tashmë nga Irani dhe të tjerë po përgatiteshin të bënin të njëjtën gjë. 

Mbyllja e ambasadës u vendos të mërkurën, një ditë pasi qeveria thirri ambasadorin e Iranit për të shprehur protestën e saj kundër shtypjes së dhunshme të demonstratave kundër regjimit dhe për t'i kërkuar Teheranit të respektojë të drejtat e qytetarëve iranianë.

Në një deklaratë të postuar në X, ministri i jashtëm Paulo Rangel tha se Portugalia ishte gati të bashkohej me çdo shtrëngim të përbashkët të sanksioneve kundër Iranit nga Bashkimi Evropian.

Këshilli i Sigurimit i Organizatës së Kombeve të Bashkuara ka planifikuar një takim urgjent pasditen e sotme, për të diskutuar zhvillimet në Iran.

Sipas mediave të huaja, takimi i Këshillit të Sigurimit të OKB-së u thirr me kërkesë të Shteteve të Bashkuara të Amerikës.

Kujtojmë se Irani gjatë ditëve të fundit ishte ‘mbërthyer’ nga protestat masive, ndaj të cilave regjimi nisi shtypjen me metoda të dhunshme, duke vrarë disa qindra demonstrues.

Sipas një raporti nga agjencia e lajmeve Associated Press, protestat që ‘mbërthyen’ Iranin gjatë ditëve të fundit, thuajse janë shtypur tërësisht.

Në javën që kur Teherani zbatoi një bllokim të internetit, ai ka kryer një shtypje të dhunshme ndaj protestuesve, për të cilën një grup i të drejtave të njeriut thotë se ka çuar në të paktën 2,615 vdekje.

Në Teheran, dëshmitarët i thanë AP-së se mëngjeset e fundit nuk panë shenja të zjarreve të ndezura gjatë natës, apo mbeturina në rrugë nga trazirat, siç ishte parë më parë.

Në mënyrë të ngjashme, u raportua se zhurma e të shtënave me armë zjarri, e cila kishte qenë intensive për disa netë, ishte zbehur gjithashtu.

Në median shtetërore iraniane, u pretendua se ishin kryer disa valë arrestimesh, duke synuar ata protestues që regjimi i quante “terroristë”.

“Që nga 8 janari, kemi parë një luftë të plotë dhe kushdo që ishte në tubim që atëherë është kriminel”, tha ministri i Drejtësisë së Iranit, Amin Hossein Rahimi, sipas një raporti nga agjencia e lajmeve Mizan e gjyqësorit.

Donald Trump e ka informuar ekipin e tij të sigurisë kombëtare se do të donte që çdo veprim i SHBA-së në Iran t'i japë një goditje të shpejtë dhe vendimtare regjimit në Teheran, sipas NBC News.

Duke cituar një zyrtar amerikan, dy persona të njohur me diskutimet dhe një person të afërt me Shtëpinë e Bardhë, raporti shton se Trump po kërkon të shmangë çdo konflikt të zgjatur dhe të zvarritur.

"Nëse ai bën diçka, ai dëshiron që ajo të jetë përfundimtare", i tha NBC-së një nga njerëzit e njohur me diskutimet.

Presidenti amerikan është i gatshëm dhe i vullnetshëm të mbajë premtimin e tij ndaj protestuesve në vend për të ndërhyrë në mbështetje të përpjekjeve të tyre, shton raporti.

Ministri i jashtëm turk, Hakan Fidan, tha se Turqia kundërshton një operacion ushtarak kundër Iranit .

"Ne jemi kundër një operacioni ushtarak kundër Iranit. Ne besojmë se problemet autentike të Iranit duhet të zgjidhen vetë.", deklaroi Fidan.

“Ne absolutisht duam që problemet të zgjidhen përmes dialogut”, shtoi ai, gjatë një komunikimi me mediat në Stamboll.

Presidenti i SHBA-së, Donald Trump shprehu pasiguri nëse udhëheqësi i opozitës iraniane në mërgim, Reza Pahlavi do të jetë në gjendje të sigurojë mbështetje brenda Iranit për të marrë përfundimisht pushtetin.

"Ai duket shumë i mirë, por nuk e di se si do të vepronte brenda vendit të tij. Dhe ne me të vërtetë nuk jemi ende në atë pikë. Nuk e di nëse vendi i tij do ta pranonte apo jo udhëheqjen e tij, dhe sigurisht nëse do ta pranonin, kjo do të ishte në rregull për mua.", tha Trump për Reuters.

Foto: Ali Khamenei dhe Donald Trump

Udhëheqësit klerikë të Republikës Islamike në Iran po bëjnë përpjekje për ta shtypur valën më të madhe të protestave antiqeveritare ndër vite, duke nxitur kërcënime për ndërhyrje nga SHBA-ja.

Vetë presidenti amerikan, Donald Trump tha se regjimi në Iran mund të bjerë, për shkak të trazirave që kanë përfshirë vendin.

"Qeveria mund të bjerë për shkak të trazirave, çdo regjim mund të dështojë"., u shpreh Trump nga Zyra Ovale.

Irani po përballet me protestat më të mëdha kundër regjimit klerikal në vitet e fundit, me autoritetet që po shtypin me brutalitet pakënaqësitë në rritje. Protestat nisën më 28 dhjetor për shkak të pakënaqësive me krizën ekonomike, zhvlerësimin e monedhës kombëtare dhe krizës energjetike.

Shtetet e Bashkuara kanë shprehur mbështetje për protestuesit iranianë, me presidentin amerikan, Donald Trump, që ka paralajmëruar autoritetet në Teheran se Uashingtoni do të ndërhyjë nëse Irani vret protestues.