Prej 1 muaji, banorët e Rrjollit kundërshtojnë ndërtimin e resortit luksoz të botuesit dhe ndërtuesit Bashkim Ulaj, pretenduar në tokat e tyre. Përplasjet e banorëve me efektivët e policisë sa vijnë dhe përshkallëzohen nga dita në ditë teksa ata tentojnë që të bllokojnë punimet e kompanisë së Ulajt “Gener 2”.  

Banorët shihen me duar të gjakosura, ndërsa policia është bërë gardh para tyre për t’i ndaluar të futen në kantier. Dy prej qytetarëve kanë pësuar lëndime si pasojë e përplasjeve të dhunshme me policinë dhe janë dërguar në spital për të marrë ndihmë mjekësore.

Banorët e Rrjollit zotohen për të mos hequr dorë nga prona e tyre. Disa ditë më parë, familjes Malaj i është njohur e drejta e pronësisë mbi një sipërfaqe prej 20,700 m², rreth 2.1 hektarë, në fshatin Rrjoll në Velipojë, në një zonë kufitare me vendin po ndërtohet resorti “Blue Borgo”.

Vendimi u dha nga Gjykata e Apelit të Juridiksionit të Përgjithshëm në Tiranë, e cila pranoi pjesërisht padinë e Nikollë Malajt kundër Agjencisë së Trajtimit të Pronave, një proces gjyqësor i nisur që në vitin 2018 dhe që zgjati 8 vite.

Duke qenë se beteja është fituar për 2.1 hektarë, banorët shpresojnë se do të merret një vendim pozitiv nga Gjykata edhe për zonën ku Ulaj po ndërton. Kjo pasi sipas tyre, Fatmir Shpellzaj, ish-drejtor kadastre dhe eksponent i Partisë së Lirisë, i cili pretendon se zotëron tokën ku Ulaj po ndërton, ka falsifikuar dokumentet për marrjen e saj në pronësi.

Punimet për ndërtimin e “Blu Borgo”-s në një sipërfaqe prej 146 hektarësh, Bashkim Ulaj i nisi në fillim të shkurtit pasi mori lejen e ndërtimit. Projekti parashikon 33 struktura akomoduese dhe shërbimi, me objekte nga 3 deri në 10 kate mbi tokë dhe një kat nëntokë. Subjekti zhvillues është shoqëria “ABA Blue Borgo”, me statusin e investitorit strategjik.

Rendit zhvillimet sipas orarit:
Ora 16:36
Protestat kundër resortit të Bashkim Ulajt/ Dhuna ndaj banorëve të Rrjollit, reagon ish-deputeti i PS: Si mund të ndodhë kjo? Akt vandal dhe bandit

Ish-deputeti i Partisë Socialiste Ermal Pacaj ka reaguar ndaj përplasjeve të dhunshme të regjistruara në Rrjoll të Shkodrës nga banorët vendas me policinë. Shkak është bërë ndërtimi i resortit luksoz të Bashkim Ulajt. Banorët e kundërshtojnë duke thënë se toka është pronë e tyre.

Pecaj i referohet një momenti kur një prej punonjësve të kompanisë “Breçani Security”, të punësuar nga Bashkim Ulaj, qëllon me grusht një djalë të ri. Ish-deputeti i PS shkruan se ky është një akt i papranueshëm dhe bandit.

“Po kjo?! Si mundet me nodhe?!

Absolutisht e tepert, shumë.

Dënoj dhe e përçmoj goditjen me grushta dhe shkelma kundër banorit dhe banorëve të Rrjollit. Akt i papranueshëm, vandal dhe bandit. Këto probleme nuk zgjidhen me dhunë e brutalitet, zgjidhen me drejtësi dhe me institucione legjitime, duke respektuar të drejtat e patjetërsueshme që na garanton Kushtetuta”, shkruan Ermal Pacaj.

K.B/Shqiptarja.com

Ora 14:27
Rrjoll/ Protestat kundër resortit të Bashkim Ulajt, banorët e dëmtuar flasin nga spitali: Dje më qëlluan djalin, shteti të na dalë zot ose më keq do të bëhet

 

Si pasojë e përplasjeve të forta me policinë, dy banorë të Rrjollit mbetën të dëmtuar dhe për pasojë e dërguan në spitalin e Shkodrës për të marrë ndihmë mjekësore. Siç shihet dhe në pamje, ata janë të gjakosur të fashuar.

Banorët kërkojnë drejtësi dhe kundërshtojnë ndërtimin e resortit të Ulajt në tokën e tyre. Ata bëjnë fajtor policinë për përplasjet duke thënë se shteti është bërë palë me ndërtuesin dhe botuesin Bashkim Ulajn. Njëri prej tyre është dhe babai i djalit, i cili ditën e djeshme u godit me grusht nga një punonjës i kompanisë private “Breçani Security”, të punësuar nga Ulaj për të ruajtur kantierin.

“Si çdo ditë po shkojmë te toka e të parëve tonë. Ka qenë policia gardh. Djalin dje e kanë goditur me grushte. Nuk kthehemi pas në asnjë send. Na ka qëlluar me gurë na kanë vendosur për fund në mënyrë makabre. Do të vazhdojmë pa ndalim derisa të dali e drejta. Nuk kemi kundërshtim me shtetin, dua të bllokohen punimet. Jam dëmtuar në këmbë dhe qafë. Më kanë tërhequr zvarrë”, tha një banor.

“Shkojmë tek tokat tona , s’na lënë. Na marrim si të jemi në Kabul. Policia është 100% me palën tjetër. Të na dalë zot shteti se asgjë nuk na ka ngel më keq do të bëhet. Sa dolëm policia duke na sharë e ofenduar.  Më kapi dikush më gjuajti e më hodhi në gurë. Jam vrarë në shpinë e kraharor”, tha banori tjetër i dëmtuar.

K.B/Shqiptarja.com