Dhunës së protestuesve në Tiranë nuk i kanë shpëtuar as mediat. Një grup të rinjsh të maskuar sulmuan këtë të mërkurë kamerën e Report TV duke pamundësuar përcjelljen e një pamjeje të qartë nga një prej këndeve ku po protestohej.

 Ndërsa operatori i Report Tv vijonte punën duke filmuar incidentet në protestë si thyerja e bizneseve dhe zjarret ndaj luleve, ata e sulmuan duke e shkelmuar dhe rrëzuar kamerën në tokë.

Ata vijuan vandalizimin me pretendimin se nuk dëshironin të filmoheshin pasi identifikoheshin, ndonëse gazetarja e Report Tv Raziela Myslymaj u kërkoi disa herë që mjaftonte të spostoheshin nga objektivi. Kamera e lëvizshme e Report Tv tashmë është jashtë përdorimit.

Asociacioni i Gazetarëve të Shqipërisë dënoi sulmin e protestuesve të maskuar ndaj kamerës së Report TV. Sipas AGSH ‘sulmi ndaj pajisjeve të medias pengon drejtpërdrejt punën e gazetarëve dhe cenon të drejtën e publikut për t’u informuar’.

‘Asnjë pakënaqësi apo pretendim ndaj një medie nuk mund të justifikojë dhunën ndaj ekipeve të saj apo dëmtimin e mjeteve të punës’ shprehet shoqata e gazetarëve duke shprehur solidaritetin me ekipin e Report Tv. AGSH u bën thirrje autoriteteve të hetojnë ngjarjen, të identifikojnë autorët dhe t’i vënë ata para përgjegjësisë ligjore.

Shoqata e gazetarëve apelon protestuesit të respektojnë gazetarët dhe ekipet mediatike, ndërsa Policisë së shtetit i kërkojnë të garantojë sigurinë e tyre.

Reagimi i plotë i AGSH

AGSH dënon sulmin ndaj kamerës së Report TV gjatë protestës në Tiranë

Asociacioni i Gazetarëve të Shqipërisë (AGSH) dënon sulmin e protestuesve të maskuar ndaj kamerës së Report TV, e cila është vandalizuar gjatë protestës në Tiranë. Sulmi ndaj pajisjeve të medias pengon drejtpërdrejt punën e gazetarëve dhe cenon të drejtën e publikut për t’u informuar. Asnjë pakënaqësi apo pretendim ndaj një medie nuk mund të justifikojë dhunën ndaj ekipeve të saj apo dëmtimin e mjeteve të punës.

AGSH shpreh solidaritetin me ekipin e Report TV dhe kërkon nga autoritetet identifikimin e autorëve, hetimin e ngjarjes dhe vendosjen e tyre përpara përgjegjësisë ligjore. U bëjmë thirrje protestuesve të respektojnë gazetarët dhe ekipet mediatike, ndërsa Policisë së Shtetit i kërkojmë të garantojë sigurinë e tyre. Gazetarët duhet të raportojnë lirisht, pa u përballur me dhunë, kërcënime apo pengim, pavarësisht se nga kush ushtrohen.

Rendit zhvillimet sipas orarit:
Ora 22:54
Protestuesit sulmuan kamerën e Report Tv, Shoqata e Gazetarëve Evropianë: Goditje ndaj lirisë së medias, autorët të dalin para drejtësisë

Shoqata e Gazetarëve Evropianë (AEJ) ka dënuar ashpër sulmin fizik ndaj grupit të xhirimit të Report Tv. AEJ kërkon identifikimin dhe ndëshkimin e autorëve, ndërsa thekson se sulmi është goditje ndaj lirisë së medias. 

Reagimi i plotë

Shoqata e Gazetarëve Evropianë (AEJ) ka dënuar ashpër sulmin fizik ndaj grupit të xhirimit të Report Tv dhe shkatërrimin e kamerës gjatë protestës së dhunshme në Tiranë. AEJ kërkon identifikimin dhe ndëshkimin e autorëve,

Shoqata e Gazetarëve Evropianë (AEJ) ndjek me shqetësim të thellë ngjarjet e dhunshme të zhvilluara sot në Tiranë, ku mes të tjerash u sulmua me dhunë fizikë dhe u shkatërrua pajisja e punës (kamera) e grupit të xhirimit të televizionit Report TV.

AEJ dënon me forcë çdo akt dhune, frikësimi apo pengimi të gazetarëve dhe punonjësve të medias gjatë kryerjes së detyrës së tyre zyrtare. Gazetarët dhe operatorët në terren janë syri dhe veshi i publikut; cënimi i tyre është një goditje e drejtpërdrejtë ndaj lirisë së shtypit, të drejtës për informim dhe parimeve bazë demokratike.

E drejta për të protestuar është një shtyllë e demokracisë, por ajo nuk mund dhe nuk duhet të përdoret kurrsesi si arsyetim për të sulmuar mediat apo për të cenuar integritetin fizik të gazetarëve.

Punonjësit e medias nuk janë palë në konflikte politike apo sociale, por raportues të pavarur të së vërtetës. Përmes kësaj deklarate, AEJ i bën thirrje:

Organeve të Rendit dhe Drejtësisë: Të hetojnë me shpejtësi dhe profesionalizëm këtë incident, të identifikojnë autorët e sulmit dhe t'i nxjerrin ata përpara përgjegjësisë ligjore.

Organizatorëve të Protestave dhe Pjesëmarrësve: Të distancohen nga aktet e dhunës ndaj medias dhe të garantojnë se gazetarët mund të kryejnë punën e tyre lirshëm dhe pa frikë nga sulmet fizike apo verbale.

Autoriteteve: Të marrin masa të menjëhershme për garantimin e sigurisë fizike të gazetarëve dhe grupeve të xhirimit që raportojnë nga terreni në situata të tensionuara.

Shoqata e Gazetarëve Evropianë shpreh solidaritetin e saj të plotë me gazetarët dhe operatorët e Report TV si dhe me të gjithë koleget e kolegët që përballen me rreziqe në terren për të informuar publikun. Liria e medias është jo-negociueshme.

SI.E./Shqiptarja.com