U zgjodh lideri i ri suprem i Iranit, por askush nuk e ka parë ende në publik. Mojtaba Khamenei, djali i liderit të vrarë më 28 shkurt, është shpallur udhëheqësi i tretë i Republikës Islamike, ndërsa televizioni shtetëror thotë se ai mund të jetë i plagosur.

Pamje të transmetuara nga televizioni iranian treguan një skenë të pazakontë në sheshin Imam në Isfahan. Mijëra njerëz dolën për të festuar zgjedhjen e liderit të ri, ndërsa në sfond dëgjoheshin shpërthimet dhe shiheshin re tymi nga bombardimet e Izraelit dhe Shteteve të Bashkuara.

As shpërthimet nuk i ndalën mbështetësit e regjimit. Turma valëviti portretet e ajatollahut të vrarë dhe të pasuesit të tij, duke thirrur slogane si “Allahu Akbar” dhe “O vdekje ose Khamenei”.

Protesta u paraqit si një demonstrim force dhe uniteti për regjimin. Në të gjithë Iranin dolën në rrugë dhjetëra mijëra njerëz. Mes turmës kishte burra me rroba gri dhe gra të mbuluara me çador të zi, si në çdo marshim pro regjimit. Por në ekran u panë edhe të rinj që mund të kishin qenë pjesë e protestave kundër pushtetit vetëm tre muaj më parë.

Mes tyre kishte vajza me kapele për të shmangur detyrimin për shami dhe të rinj që përdorin TikTok. Në dhjetor ata brohorisnin “liri” dhe “vdekje diktatorit”. Tani turma thërriste për liderin e ri dhe vazhdimësinë e regjimit që shtypi protestat e atyre ditëve.

Megjithatë, vetë Mojtaba Khamenei mbetet në hije. Ai nuk është shfaqur asnjëherë në televizion dhe nuk ka mbajtur kurrë një takim publik. Për vite është përshkruar si njeriu në prapaskenë, krahu i djathtë i të atit, i lidhur ngushtë me Gardën Revolucionare dhe me aparatin e sigurisë.

Televizioni shtetëror tha se ai mund të jetë plagosur gjatë bombardimit të ndërtesës ku ndodhej edhe i ati. Në atë sulm thuhet se u vranë gjithashtu nëna e tij, bashkëshortja dhe një nga djemtë.

Historia e liderëve supremë të Iranit është dramatike. Ajatollah Khomeini vdiq në shtrat. Ajatollah Khamenei u vra më 28 shkurt nga raketa izraelite dhe amerikane. Djali i tij, Mojtaba, rrezikon të përballet me të njëjtin fat.

Shtetet e Bashkuara dhe Izraeli nuk e fshehin se ai konsiderohet objektiv, pasi shihet si vazhdimësi e plotë e linjës së të atit dhe nuk jep asnjë sinjal tërheqjeje nga përballja që kërkon president Donald Trump.

Ndërkohë disa aleatë ndërkombëtarë kanë shprehur mbështetje. Mes të parëve ishte presidenti rus Vladimir Putin, më pas sultani i Omanit dhe Kina, ndërsa mbështetje erdhi edhe nga Hezbollah në Liban, nga Houthi në Jemen dhe nga milicitë proiraniane në Irak.

Brenda Iranit, institucionet ushtarake dhe të sigurisë u rreshtuan menjëherë pas tij. Ushtria, policia, Basij dhe Garda Revolucionare publikuan deklarata besnikërie në internet, duke u shprehur se janë “gati të binden deri në sakrificën supreme”.

Në të njëjtën kohë, ata i dhanë edhe titullin ajatollah, që Mojtaba Khamenei nuk e kishte deri tani. Konflikti për pasardhësin duket se ka marrë fund. Klerikët, politikanët dhe ushtria janë rreshtuar rreth pushtetit, ndërsa vendi ndodhet në luftë. Në këtë klimë, çdo kundërshtim rrezikon të trajtohet si tradhti./CorrieredellaSera