VLORË- Policia e Vlorës ka vënë në pranga administratorin e kompanisë së ndërtimit në aeroportin e Vlorës, pasi një punonjës humbi jetën teksa punonte.

Ai akuzohet për veprën penale ‘Shkelja e rregullave të mbrojtjes në punë’.  

Nga ana tjetër është vënë edhe përgjegjësi i punimeve, i cili bashkë me administratorin akuzohen se nuk kanë zbatuar masat e sigurisë teknike në vendin e punës, çka ka sjellë si pasojë vdekjen e punonjësit Dorian Hasani, 45 vjeç.

Njoftimi i policisë

Në vijim të veprimeve hetimore për ngjarjen e ndodhur më datë 19.04.2025, në ambientet e aeroportit në ndërtim, në Akërni, ku humbi jetën si pasojë e rrëzimit nga lartësia, shtetasi D. H., 38 vjeç, punonjës i kompanisë së ndërtimit, specialistët për Hetimin e Krimeve të Komisariatit të Policisë Vlorë arrestuan në flagrancë, për veprën penale “Shkelja e rregullave të mbrojtjes në punë”, shtetasin D. N., 45 vjeç, banues në Tiranë, me detyrë administrator i kompanisë së ndërtimit, si dhe nisën procedimin penal për shtetasin U. S., 41 vjeç, banues në Tiranë, me detyrë përgjegjës i punimeve në të njëjtën kompani. Këta shtetas dyshohet se kanë shkelur detyrimet ligjore për zbatimin e masave të sigurisë teknike në vendin e punës, çka ka sjellë si pasojë vdekjen e punonjësit D. H.