NATO: Putin të largohet nga Ukraina, rrezikon edhe Bosnjën e Gjeorgjinë! S'futemi në luftë, kemi përgjegjësi për 1 miliard njerëz! Blinken: SHBA-BE duhet ta mbajnë Rusinë nën presion

Ministrat e Jashtëm të G7 thanë se Rusia me sulmet ndaj Ukrainës do të mbajë përgjegjësi për krimet e luftës. Ata bën thirrje që të ndalen sulmet ndaj centraleve bërthamore dhe se krijimi i korridoreve humanitare të bëhen sa më shpejtë.   

 "Ne do të mbajmë përgjegjësi ndaj atyre që janë përgjegjës për krimet e luftës, duke përfshirë përdorimin pa kriter të armëve kundër civilëve, dhe ne mbështesim hetimet dhe mbledhjen e provave, veçanërisht nga prokurori i Gjykatës Penale Ndërkombëtare. Krijimi i shpejtë i korridoreve të reja humanitare për refugjatët që ikin nga Ukraina dhe fundi i sulmeve nga Rusia në afërsi të termocentraleve bërthamore të Ukrainës duhet të ndodhin sa më parë", tha G7

Shtetet e Bashkuara dhe Bashkimi Evropian duhet të vazhdojnë presionin ndaj Rusisë për t'i dhënë fund luftës në Ukrainë, tha në Bruksel Sekretari Amerikan i Shtetit Antony Blinken.

Ministrja e jashtme Olta Xhaçka e cila ishte e pranishme në mbledhjen e jashtëzakonshme të NATO-s, tha se Shqipëria mbete krahë Ukrainës dhe do e ndihmojë atë në çdo mënyrë që të mundet. Xhaçka tha se sulmi rus mbi Ukrainë është i pajustifikuar dhe se duhet të ndalet

 "Në takimin e jashtëzakonshëm të Ministrave të Punëve të Jashtme të vendeve të NATO-s sot u konfirmua sërish me forcë vendosmëria e aleatëve për të mbështetur popullin e Ukrainës në luftën  heroike që ka fituar admirimin dhe respektin e të gjithë botës. Shumë vende evropiane, vetë Bashkimi Evropian, Shtetet e Bashkuara të Amerikës kanë ndërmarrë masa në mbështetje të popullit ukrainas që do të kishin qenë të paimagjinueshme ndoshta edhe pak muaj më parë, duke i furnizuar me armatime, duke kaluar disa paketa sanksionesh  masive që po i japin një goditje shumë të rëndë Rusisë, duke ia rritur në mënyrë të jashtëzakonshme koston e këtij agresioni kriminal, që tashmë edhe me bashkëpunimin e Shqipërisë i është referuar Gjykatës Ndërkombëtare Penale për të hetuar për krime lufte.Shqipëria ka luajtur një rol domethënës në këto përpjekje për të mbështetur Ukrainën, edhe me ndihmë materiale konkrete, por sidomos në fushën e diplomacisë, ku pardje siç keni pasur mundësinë ta ndiqni u arrit një fitore vërtet e rëndësishme duke miratuar me shumicë absolute votash një rezolutë të bashkësponsorizuar nga Shqipëria ku i kërkohej Rusisë t’i japë fund luftës.Theksova në takim se duhet bërë më shumë, të bëhet më shumë që të ndalet sulmi i pajustifikuar mbi Ukrainën dhe mbi sigurinë e sistemin ndërkombëtar.Unë dua t’i garantoj qytetarët shqiptarë, të cilët kanë treguar gjatë këtyre ditëve një solidaritet të jashtëzakonshëm me popullin ukrainas duke mbledhur ndihma, që roli që ka luajtur Shqipëria është vlerësuar maksimalisht nga aleatët dhe që bashkë me ta do të vazhdojmë punën e mirë që kemi bërë gjatë këtyre javëve në Këshillin e Sigurimit, në NATO, në OSBE, në Këshillin e Europës dhe në çdo forum ndërkombëtar ku mund të ofrojmë mbështetjen tonë për popullin ukrainas, lufta e të cilit nuk është thjesht një luftë për mbijetesën e Ukrainës por një luftë për paqen e sigurinë në kontinentin evropian", tha Xhaçka.

"Rusët po bombardojnë gjithçka: spitale, shtëpi dhe shkolla me shumë viktima civile. Kjo është një mënyrë barbare për të bërë luftë." Kështu deklaroi Përfaqësuesi i Lartë i BE-së për Politikë të Jashtme, Josep Borrell, pas mbërritjes së tij në Këshillin e Punëve të Jashtme së bashku me Sekretarin Amerikan të Shtetit, Antony Blinken.

"Këshilli i OKB-së për të Drejtat e Njeriut do të dërgojë së shpejti një mision për të hetuar shkeljet e të drejtave të njeriut që po ndodhin në Ukrainë. Kjo është lufta e Putinit. Dhe Putini duhet ta ndalojë atë. Ne do të jemi të bashkuar në thirrjen që kjo luftë të ndalet. dhe të shmangim vrasjet njerëz të pafajshëm”, shtoi kreu i diplomacisë së BE-së.

Borrell tha se bota është në anën e duhur dhe se vota e OKB-së e vërteton këtë.

"Bota është me Ukrainën, është në anën e duhur të historisë. Ky votim dërgoi një sinjal të qartë. Sot Këshilli i të Drejtave të Njeriut votoi përsëri dhe krijoi një komision të pavarur hetimor për situatën humanitare dhe rezultati ishte shumë i qartë. : 32 vota pro, 2 kundër, 3 abstenime”. Kështu deklaroi Përfaqësuesi i Lartë i BE-së për Politikë të Jashtme, Josep Borrell, në konferencën për shtyp në përfundim të Këshillit të jashtëzakonshëm të BE-së për Punë të Jashtme

 "Shpresoj se (sanksionet) do të dëmtojnë makinën ruse të luftës. Presidenti Putin donte të na përçante, por ai arriti të kundërtën. Ne jemi më të bashkuar se kurrë dhe Rusia është plotësisht e izoluar nga komuniteti ndërkombëtar, siç tregoi qartë votimi në Asamblenë e Përgjithshme. ", ai shtoi.

Sekretari i Përgjithshëm i NATO-s, Jens Stoltenberg ka deklaruar se ka prova që Rusia po përdor bomba thërrmuese në pushtimin e Ukrainës.

Në një konferencë shtypi, ai u tha gazetarëve në bazë të disa raporteve janë gjetur prova se po përdoren armë që janë në kundërshtim me drejtën ndërkombëtare.

 "Ne kemi parë përdorimin e bombave thërrmuese dhe kemi parë raporte për përdorimin e llojeve të tjera të armëve që do të ishin në kundërshtim me të drejtën ndërkombëtare", tha Stoltenberg.

"Veproni tani ose do të jetë shumë vonë." Ky është mesazhi i ministrit të Jashtëm të Ukrainës, Dmytro Kuleba, gjatë takimit të NATO-s me homologët e vendeve të tjera të Aleancës. "Mos lejoni që Putini ta transformojë Ukrainën në Siri. Ne jemi gati të luftojmë. Ne do të vazhdojmë të luftojmë. Por ne kemi nevojë për ndihmën konkrete dhe të vendosur të partnerëve tanë tani", shkroi ai në Twitter.

Bashkimi Europian si njësi më vete, Finlanda dhe Suedia do të jenë pjesë e diskutimeve brenda NATO-s për përballjen me Putin.

Sekretari i Përgjithshëm i NATO-s Stoltenberg tha se situata mund të rrezikojë edhe vende të tjera.

"Ne nuk jemi pjesë e kësaj konflikti. Nëse do të ishim do të ishte një situatë shumë e rrezikshme. Rusia kërkon të krijojë një zonë të re influence. Dhe kjo do të rrezikonte edhe Gjeorgjinë apo Bosnje-Hercegovinën. I bëjmë thirrje Rusisë që të pranojë bisedimet.  Sot ishin me ne edhe BE, edhe Suedia edhe Finlandë. Të dyja vendet do të marrin pjesë në çdo konsultim që ne po bëjmë për këtë situatë", tha ai.

Sekretari i Përgjithshëm i NATO-s Jens Stoltenberg po flet në një takim të ministrave të jashtëm në Bruksel këtë pasdite.

Ai ka paralajmëruar se "ditët që do të vijnë ka të ngjarë të jenë më të këqija" për Ukrainën, me "më shumë vdekje, më shumë vuajtje dhe më shumë shkatërrim".

Stoltenberg shtoi se Rusia ka të ngjarë të sjellë "armë më të rëndë" ndërsa ata vazhdojnë sulmet e tyre në të gjithë vendin e rrethuar.