Për të katërtën javë radhazi, francezët protestojnë kundër COVID-19

Për të katërtën javë radhazi qytetarët franceze kanë protestuar kundër vendosjes me detyrim të pasaportës së vaksinimit.  Protestuesit dolën në rrugët në të gjithë Francën, dy ditë para se Certifikata e shëndetit të hynte në fuqi.

Rregullat e reja të prezantuara nga Presidenti Francez Emmanuel Macron, kërkojnë që qytetarët të paraqesin Certifikatën e COVID për të marrë pjesë në aktivitetet e zakonshme.

Ditën e sotme janë planifikuar protesta në një numër qytetesh, përfshirë Parisin, Lille dhe Toulon.

Në njërën prej protestave të planifikuara në zonën e Parisit, qindra filluan të mblidheshin në stacionin e metrosë Pont de Neuilly për një marshim drejt qendrës së qytetit, duke brohoritur "Liri!" dhe "Jo Green Pass ".

Të enjten Gjykata e Lartë franceze e konsideroi atë një "kompromis të balancuar" midis shqetësimeve të shëndetit publik dhe lirive personale.

Kritikët akuzojnë Macron për drejtimin e një "diktature" shëndetësore duke i detyruar njerëzit të vaksinohen kundër vullnetit të tyre. Ata thonë se certifikata kufizon lëvizjet e tyre jashtë shtëpisë dhe në mënyrë të nënkuptuar i bën vaksinimet të detyrueshme.

Macron, shpreson se rregullat e reja do të inkurajojnë të gjithë francezët të vaksinohen kundër Covid-19 dhe të mposhtin virusin dhe variantin Delta që përhapet me shpejtësi.

Më shumë se 79% e të rriturve francezë kanë marrë të paktën një dozë dhe 68% janë plotësisht të vaksinuar. Ndërkohë që të paktën 7 milionë njerëz kanë marrë vaksinën e tyre të parë që kur Presidenti Emmanuel Macron njoftoi vendosjen me detyrim të pasaportës COVID.

TAG:
• Franca
• Koronavirus
• Vaksina Covid