Që Edi Rama të bjerë nga pushteti...

Që Edi Rama të bjerë nga pushteti...

Kryeministri Edi Rama

Ekziston sot një ide se të jesh kundër “Foltores”, të mos mbështesësh lëvizjen revolucionare të zotit Berisha apo, më keq akoma, të jesh në antagonizëm të plotë me Ilir Metën dhe filozofinë e tij të hajnisë së shtetit, e fshehur kjo herë nën petkun e integrimit e herë nën gjethet e luftës së pakompromis kundër korrupsionit..., je automatikisht me Edi Ramën.

Kjo mënyrë të pari bardhezi, nuk është as e re, as e panjohur, duke e ditur se polarizimi ekstrem i ligjërimit sipas modelit “o me ne, o me armikun” është sa arkaik aq edhe demode dhe të vetmit që mund të entuziazmohen nga kjo gjë janë militantët, të cilët, historikisht, me egërsinë dhe verbërinë e tyre, nuk është se kanë shërbyer për ndonjë gjë pas përdorimit.

Në fakt, nuk është kështu.  Zgjedhjet e fundit treguan që nuk mjafton konsumimi i kundërshtarit dhe korrupsioni i madh në radhët e pushtetit që rotacioni të ndodhë.

Ndryshimi i pushtetit nuk mund të vijë as nga egërsia e ligjërimit të protagonistëve kryesor të opozitës. Mund ta fyesh gjithë ditën Edi Ramën dhe të mos ndodhë asgjë. Kjo mund të kënaqë me lugën bosh mendjet e zbrazëta, por nuk të jep asnjë përfitim elektoral në shportën e madhe të ndryshimit të shumëpritur.

Në këtë gjendje ku ndodhet sot pushteti, në mandatin e tij të tretë, me një mal aferash korruptive dhe skandalesh të mëdha që shfaqen dita-ditës nëpërmjet një mekanizmi ‘skandali mbulon skandalin’, logjika e kërkon që qeveria të binte, Kryeministri të jepte dorëheqjen dhe palët të uleshin për të dialoguar se si mund të dilej nga kjo situatë.

Jo vetëm që kjo nuk ka shenja të ndodhë, por Edi Rama është më i lumtur se kurrë dhe më i qetë se asnjëherë tjetër përballë një opozite të çefterrosur dhe dy liderëve të ngrefosur si kaponjtë në majë të plehut, të cilët nuk u thonë asnjë gjë të re shqiptarëve, për shkak të konsumit të tyre të jashtëzakonshëm dhe malit të problematikave që kanë mbi shpinën e tyre të kërrusur nga vitet e gjata në pushtet.

Që ndryshimi të ndodhë, që Edi Rama të bjerë, që vendi të ketë të domosdoshme një qeveri tjetër, duhet që opozita të rregullohet, të shpëtojë nga pengmarrja, të krijojë një fizionomi të re, një ligjërim të ri, larg figurave aktuale dhe mendësisë së tyre të të bërit opozitë dhe të të ushtruarit pushtet.

Që ndryshimi të ndodhë dhe që Edi Rama të bjerë nga pushteti, opozita duhet të japë një alternativë të re politike dhe, mbi të gjitha, morale, me figura të reja, të pakonsumuar, të papërfolur dhe që nuk mbajnë mbi shpinë anjë hije dyshime nga e kaluara.

Që ndryshimi të ndodhë dhe që Edi Rama të bjerë nga pushteti, opozita nuk duhet të përmirësojë vetëm fasadën, por edhe thelbin, nuk duhet të ndryshojë vetëm formën, por edhe përmbajtjen.

Që ndryshimi të ndodhë dhe që Edi Rama të bjerë nga pushteti, opozita, së pari, duhet të fitojë betejën me veten, duke gjetur forca që elementët pozitivë të mbizotërojnë ata negativë, që të ndershmit të triumfojnë mbi të korruptuarit, që progresistët të mundin promovuesit e regresit, që euro-atlantikët të triumfojnë mbi mendësinë bizantine.

Mirëpo, kjo opozitë me në krye Sali Berishën, që nuk mund të jetë zgjidhës i halleve të opozitës për sa kohë që i është bërë asaj halli më i madh mbi shpinë, shfaqet sot më e lodhur se kurrë, më e përçarë se asnjëherë tjetër dhe më e vjetëruar se vet e vjetra.

Pra, është ky mjerim dhe kjo situatë e sotme e opozitës, ajo që e mban Edi Ramën në pushtet.

Dhe përderisa demokratët të mos e kuptojnë një gjë të tillë, thjesht do të entuziazmohen nga egërsia e ligjërimit të liderëve të tyre, të cilët, gjithsesi, punët e tyre i kanë të zgjidhura, ashtu siç do të kenë të zgjidhur edhe alibinë e radhës: pushteti na vodhi votat i ndihmuar edhe nga tradhëtarët e jashtëm dhe të brendshëm në radhët tona.

A nuk e shtyu për 45 vjet me radhë Enver Hoxha duke shpikur përditë armiq të brendshëm dhe të jashtëm?

B.K./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • populli: 16/08/2022 14:03

    super analize !!!

    Përgjigju
  • Cubi: 16/08/2022 13:54

    Une e kuptoj fort mir qe Rama eshte I korruptuar dhe e ka mbushur jam dakort si votes si qytetar. Por sme le rehat nje pyetje qe me sillet verdall ne koke. Kujt tja japesh kete derr pushteti sali qenit,ilir hajvanit kokrra hajdutit,cunit falliut,ed paloqes apo strazimir patllakes???????????? Ka te tjer pa fund sa mund te mbushesh ne fletore. Joooooo ne asnje menyre me mire te rrije Rama edhe per ca vjet,njeqind here me mir,te pakten ste vret naten e te te qaj diten si keta qener qe permenda me lart. Ah po harrova noken dulen Medi gerdecin ne fund mona zhozi zhelja etj.

    Përgjigju
  • Hasan Aga: 16/08/2022 13:19

    Si ju duket çuni i Fariut.. apo Grida me Salinjan Babalen.. Prurje te reja ne PD….

    Përgjigju
    • Bureto: 16/08/2022 19:32

      E dini cila do te jete zgjidhja me e mençur per momentin, zgjidhje qe mund dhe duhet ta japë vetem Edi Rama? Ai që te konsiderohet burre shteti, pa patur ndonje rrezik pushteti, por per t'u treguar kundershtareve te tij se, pavaresisht stuhise se kritikave dhe shpifjeve ndaj tij, ai i mund, keshtu pra le te kerkoje edhe njehere votbesimin e elektoratit, duke e çuar vendin ne zgjedhje te parakohshme. Sot, në mungese të nje njeriu si Ilir Meta (Metaj) në Presidence, kjo mund te behej pa asnje veshtiresi. Ne te kundert Ilir Meta (Metaj) me siguri duke e ditur se ne çfare derexhe eshte opozita e tij dhe e Berishes, nuk do t'i shpallte kurre zgjedhjet e parakohshme, sepse keshtu jo vetem qe nuk do t'i fitonin ato, perkundrazi do ta forconin Ramen edhe më shume. Uroj qe Rames, në mos ia kane keshilluar, t'i kete shkuar ndermend edhe ky version. Nje version edhe me i mire mund te ishte dhe qe ato te zhvillohen në nje dite me zgjedhjet lokale të pranveres 2023. Kursehen keshtu dhe ca para nga buxheti i shtetit, sepse ne e dime qe nje fushate zgjedhjes dhe vete zgjedhjet, kushtojne mbi 20-25 mln. Euro. Per nje vend te varfer si ky i yni nuk jane pak. Ky vendim i Rames nuk do te ishte unik, precedente te tille burrash shteti ka patur kudo ne Europe dhe në rajon. Rasti i Zajevit, eshte një prej tyre.

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

Përkujtohet 80-vjetori i betejës së Margëlliçit, Balla: Askush mos guxojnë të përdhosë historinë dhe të rivrasë të rënët tanë

Përkujtohet 80-vjetori i betejës së Margëlliçit, Balla: Askush mos guxojnë të përdhosë historinë dhe të rivrasë të rënët tanë