Qeveria e re në "duart" e Metës
të dielën prezantohet struktura

Ditën e diel shqiptarët do të njihen më një strukturë të re qeverisëse e cila do të ketë më pak ministri, pas bashkimit të disa prej tyre mes njëra-tjetrës.

Edi Rama dhe Niko Peleshi në cilësinë e kryetarit të grupit të punës për reformën në administratë do të prezantojnë të dielën përpara asamblesë socialiste formatin e qeverisë së re.

Burime nga grupi i punës bëjnë me dije se skeleti i qeverisë së re është në përfundim dhe se disa ministri do të shkrihen në një duke i rishpërndarë përgjegjësitë.

Kështu, Ekonomia mund të bashkohet me energjetikën siç ishte gjatë qeverisë Berisha, ndërsa Ministria e Pushtetit Vendor mund të jetë bashkë me atë të Zhvillimit Urban.

Tek Bujqësia do të rikthehen sërisht edhe përgjegjësitë për Mjedisin, ndërsa Kultura do të rimarrë sërish Turizmin dhe Sportin. Ministria e Marrëdhënieve me Parlamentin mund të shkrihet, tashmë që socialistët drejtojnë të vetëm edhe qeverinë edhe kuvendin.

Drejt bashkimit mund të shkojnë edhe Ministrja e Jashtme dhe ajo e Integrimit. Ngelen të pa ndryshuara ministritë e “rënda” si e Brendshmja, e Mbrojtjes, e Financave, e Shëndetësisë dhe e Drejtësisë.

Kjo skemë finale do të prezantohet ditën e diel, ndërsa emrat Edi Rama pritet t’i bëjë publikë në fillim të javës tjetër, përpara datës 5 shtator. Parlamenti pritet të mblidhet në 7 shtator, ditën e enjte, dhe deri atëherë, Edi Rama duhet të bëjë publikë kabinetin e ri, por jo vetëm kaq. Ai duhet të ketë marrë “bekimin” e Metës si President për ekipin e ri, i cili duhet t’i dekretojë ministrat përpara se seanca parlamentare e 7 shtatorit t’i votojë ata duke i vendosur zyrtarisht në detyrë.

Deri më tani, vendimi i vetëm emëror që Edi Rama ka prezantuar është ai i Gramoz Rucit në krye të Kuvendit të Shqipërisë. Sa u takon ministrave, një ndër emrat më të fortë për tu rikthyer është ai i Fatmir Xhafës në Ministrinë e Brendshme, ndërkohë që ministrat më të suksesshëm në qarqet e vendit pritet të rikonfirmohen, dhe pse burimet thonë se Edi Rama ka surpriza. 

Redaksia Online
D.T/Shqiptarja.com

TAG:
• gramoz ruçi