Arritja e marrëveshjes mes Lëvizjes Vetëvendosje dhe Lidhja Demokratike e Kosovës, ka sjellë reagime nga politika shqiptare. Njëzëri, presidenti Ilir Meta, kryeminstri Edi Rama, por edhe krerët e partive opozitare, Lulzim Badha dhe Monika Kryemadhi kanë vënë theksin tek rritja e bashkëpunimit mes dy vendeve, në arritjen e marrëveshjeve konkrete. 

Rendit zhvillimet sipas orarit:
Ora 15:37
Qeveria e re e Kosovës/ Kryemadhi: Të rritet më tej bashkëpunimi mes dy vendeve

Një urim për krijimin e qeverisë së re të Kosovës e ka pasur edhe kryetarja e Lëvizjes socialiste për Integrim, Monika Kryemadhi. Në reagimin e saj Kryemadhi vë theksin tek bashkëpunimi mes dy vendeve.

"Shpreh kënaqësinë dhe përshëndes arritjen e Marrëveshjes për krijimin e qeverisë së re të Kosovës midis Vetëvendosjes dhe Lidhjes Demokratike.

I uroj VV dhe LDK sukses në krijimin e një qeverie të qëndrueshme e efikase në përballjen me sfidat e mëdha në shërbim të qytetarëve të Kosovës, në njohjet e reja dhe integrimin e mëtejshëm në organizatat rajonale e ndërkombëtare.

Uroj gjithashtu që mes dy vendeve tona të rritet më tej bashkëpunimi dhe integrimi në të mirë të të gjithë qytetarëve, si dhe për forcimin e paqes dhe prosperitetit në të gjithë rajonin", shkruan Kryemadhi.

B.K./Shqiptarja.com

Ora 15:36
Qeveria e re e Kosovës/ Cakaj: Bashkëpunimi mes dy vendeve domosdoshmëri

Ministri i Jashtëm, Gent Cakaj uron VV dhe LDK në formimin e Qeverisë së re të Republikës së Kosovës. Në reagimin e tij, Cakaj e cilëson bashkëpunimin mes dy vendeve si një domosdoshmëri.

"Në sfidat e shumta që qëndrojnë para nesh, bashkëpunimi i shtuar mes Kosovës e Shqipërisë është i domosdoshëm.  Presim me padurim të fillojmë me biseda përmbajtësore me Qeverine e re të Kosovës për të zhvilluar një program të përbashkët e në të mirë të dy vendeve", shkruan Cakaj.

B.K./Shqiptarja.com

Ora 14:17
Marrëveshja LVV-LDK, reagon Basha: Akt pjekurie politike

1580649532_basha.jpg

Kryetari i PD-së, Lulzim Basha me anë të një postimi në rrjetet sociale ka reaguar as marrëveshjes mes Vetëvendosjes dhe LDK-së për koalicionin duke e quajtur një marrëveshje që do t’i hapë rrugë krijimit të qeverisë së re dhe do të çojë në fund vullnetin e popullit.

Basha mes të tjerash deklaroi se Partia Demokratike do të jetë plotësisht në krah e mbështetje të Kosovës.

"Në emrin tim e të Partisë Demokratike, përshëndes përzemërsisht LVV dhe simotrën tonë LDK për marrëveshjen e arritur. Marrëveshja e sotme është një plotësim i vullnetit të qytetarëve të Kosovës. Ajo është një akt ndershmërie dhe pjekurie politike e një vizioni të qartë të drejtuesve të LVV dhe LDK. Kjo marrëveshje është përgjigje konkrete e vullnetit për ndryshim i qytetarëve të Kosovës.  Partia Demokratike si përgjatë çdo dite të historisë së saj, do të jetë plotësisht në krah e mbështetje të Kosovës dhe udhëheqësisë së saj, sot në opozitë e më fort nesër në qeverisjen e vendit, në sfidat që i kemi përpara dhe që kërkojnë angazhim të sinqertë e bashkëpunim vëllazeror." shkruan Basha. 

Ora 13:28
Qeveria e re në Kosovë, Rama: Pres të flasim për lëvizjen e lirë në kufirin tonë

Kryeministri Edi Rama i uron suksese koalicionit qeveritar në Kosovë dhe shpreson te një bashkëpunim i dobishëm për shqiptarët këtej e andej kufirit.

Në mesazhin e tij, Rama thotë se pret me padurim për të shtruar në tryezë çështjen e lëvizjes së lirë të qytetarëve e të sipërmarrjeve në kufirin tonë duke nënkuptuar shengenin Ballkanik, që shkaktoi debate në dy anët e kufirit pas refuzimit që Kosova i bëri samitit të Tiranës pak javë më parë.

"Suksese VV-LDK në formimin e qeverisë së re dhe në qeverisjen e Kosovës! Uroj të kemi një bashkëpunim sa më të dobishëm për shqiptarët këtej e andej kufirit dhe pres me padurim të shtrojmë në tryezë çështjen e lëvizjes së lirë të qytetarëve e të sipërmarrjeve në kufirin tonë" shkruan Rama. 

Sot, pas 4 muajsh nga zgjedhjet e parakohshme të 6 tetorit në Kosovë, më në fund është arritur marrëveshja për krijimin e qeverisë së re mes Lëvizjes Vetëvendosje dhe LDK-së.

Ora 10:56
Meta përshëndet marrëveshjen Vetëvendosje-LDK: I uroj suksese qeverisë së Albin Kurtit

Presidenti i Shqipërisë Ilir Meta ka përshëndetur arritjen e marrëveshjes për krijimin e qeverisë së re në Kosovë mes Lëvizjes Vetëvendosje dhe LDK-së. "Përshëndes ngrohtësisht arritjen e marrëveshjes për bashkëqeverisje të Lëvizjes Vetëvendosja (LVV) dhe Lidhjes Demokratike të Kosovës (LDK) si dy parti fituese të zgjedhjeve të përgjithshme të 6 tetorit 2019 në Kosovë.

Një qeverisje e qëndrueshme është në interes, jo vetëm të Kosovës, por edhe të gjithë rajonit. Qeverisë së Kosovës të drejtuar nga z.Albin Kurti i uroj suksese dhe arritje sa më të mëdha në të mirë të Kosovës në sfidat që e presin" shkruan Meta. Sot, pas 4 muajsh nga zgjedhjet e parakohshme të 6 tetorit në Kosovë, më në fund është arritur marrëveshja për krijimin e qeverisë së re mes Lëvizjes Vetëvendosje dhe LDK-së.