Rama: Berisha hipokrit, është
ai që i mban peng reformat

TIRANE – Lideri i Partisë Socialiste (PS), Edi Rama, e cilësoi sot pasdite një hipokrizi thirrjen e Kryeministrit Berisha për bashkëpunim në zhbllokimin e reformës zgjedhore. “Thirrjet e Kryeministrit për opozitën sot mishërim i hipokrizisë së pushtetit që braktisi interesin e vendit për të çuar noterin partiak në Presidencë”, tha Rama përmes një mesazhi të publikuar në Twitter.

Gjatë mbledhjes së grupit parlamentar të Partisë Demokratike, Kryeministri Berisha i bëri sot thirrje kreut të opozitës që të zhbllokojë reformën zgjedhore duke lënë mënjanë ato që ai i quajti praktikat e kokës së turkut. Kreu i mazhorancës ftoi gjithashtu Ramën të punojnë për heqjen e imunitetit, çështje që siç tha ai "po mbahet peng nga këshilli i miliarderëve në PS".

Por sipas Ramës është vetë Berisha që mban peng reformat për të cilat akuzon opozitën. “Kryeministri shqelmoi fatin evropian të Shqipërisë dhe tani akuzon opozitën evropian të këtij vendi për reformat që mban vetë peng”, tha Rama duke iu referuar mungesës së konsensusit në zgjedhjen e Presidentit të ardhshëm të vendit, që u konkretizua në emrin e ministrit të Brendshëm, Bujar Nishani.

“4 pikat e planit tonë për statusin janë publike prej një muaji. Mospërmbushja e tyre është e lidhur vetëm me mungesën e vullnetit të Kryeministrit”, pohoi Edi Rama.

Katër pikat për të cilat flet kreu i PS janë bërë publike nga socialistët pas një takimi me shefit të deputetëve të selisë rozë, Gramoz Ruçi, me homologun e tij demokrat Astrit Patozi, të zhvilluar më 27 maj. Sipas socialistëve, katër pikat ku duhet të bazohet bashkëpunimi mes mazhorancës dhe opozitës janë:

1. Finalizimi i reformës zgjedhore
2. Miratimi përfundimisht i reformës parlamentare
3. Finalizimi dhe miratimi i formulës për kufizimin e imunitetit për zyrtarët e lartë të shtetit
4. Ndërtimi i një procesi gjithëpërfshirës për zgjedhjen e dakordësuar të Presidentit të ri që në raundin e parë.

Sigurisht, me zgjedhjen e Nishanit në krye të Shtetit me 73 votat e mazhorancës në raundin e katërt, pika e fundit nuk qëndron më.

(im/shqiptarja.com)

TAG:
• gramoz ruçi