Rama feston ditëlindjen përkrah Merkel-it në Poloni, Hahn: Këshilli të hapë në tetor negociatat me Shqipërinë

Eurokomisioneri Johannes Hahn në fjalën e tij sot në Samitin e Vendeve të Ballkanit Perëndimor në Poznan të Polonisë ka shprehur sërish dakordësinë e tij për hapjen e negociatave me Shqipërinë dhe Maqedoninë e Veriut.

“Unë i qëndroj rekomandimit të Komisionit për të hapur negociatat me Shqipërinë dhe Maqedoninë e Veriut dhe se në tetor Këshilli do të ndjek vlerësimin tonë pozitiv. Të dy vendet kanë bërë reforma, veçanërisht në fushat e përmendura nga konkluzionet e Këshillit të muajit qershor 2018”, tha Hahn në Samit.

Nga ana tjetër, ai është i mendimit se rajoni duhet të ndjekë shembullin e Maqedonisë së Veriut.

“I gjithë rajoni duhet të ndjekë shembullin e Maqedonisë së Veriut dhe të rrisë ritmin e reformave, veçanërisht të sundimit të ligjit, të drejtat themelore dhe qeverisjen e mirë”- u shpreh Hahn.

Komisioneri në fjalën e tij shpjegoi së në fokus të strategjive të BE-së përfshihen edhe barrierat tregtare, duke u ndalur tek ato të vendosura nga Kosova për mallrat e ardhur nga Serbia dhe Bosnja.

Ai shtoi gjithashtu se krerët e Ballkanit Perëndimor duhet të punojnë për marrëdhënie më të mira fqinjësore, bashkëpunimit rajonal dhe pajtimit pasi ato janë edhe parakushte për t’u bashkuar me BE.

Eurokomisioneri Johannes Hahn ka qenë i pranishëm në samitin e Ballkanit Perëndimor që mbahet në Pozan të Polonisë. Hahn do të mbajë fjalën hapëse në këtë konferencë ku këtë e ka konfirmuar edhe në Twitter.

Në shkrimin e tij Hahn shkruan se Ballkani Perëndimor është pjesë e Europës pasi kemi të njëjtën histori, gjeografi të njëjtë, trashëgimi kulturore të njëjtë + të njëjtat mundësi dhe sfida sot dhe në të ardhmen. Më pas Hahn shkruan se Integrimi i Ballkanit Perëndimor në BE është një realitet dhe përfitimet e këtij procesi tashmë mund të ndjehen nga qytetarët dhe bizneset jo vetëm në rajon, por edhe në BE.

“Ballkani Perëndimor është pjesë e Europës, kemi të njëjtën histori, gjeografi të njëjtë, trashëgimi kulturore të njëjtë + të njëjtat mundësi dhe sfida sot dhe në të ardhmen. Pra, të mos ketë asnjë dyshim se vendi i Ballkanit Perëndimor është në BE” shkruan Hahn në twitter.

"Integrimi i Ballkanit Perëndimor në BE është një realitet dhe përfitimet e këtij procesi tashmë mund të ndjehen nga qytetarët dhe bizneset jo vetëm në rajon, por edhe në BE. Ekonomitë e Ballkanit Perëndimor, janë të integruara ngushtë me BE. Më shumë se 70% e tregtisë së rajonit është në BE!” shkruan Hahn në një tjetër postim.