'Rama ik' ishte thirrja e të rinjve në koncertin e Noizyt gjatë mbrëmjes së djeshme kur pati një moment shkëputje të energjisë elektrike. Me këto pamje e ka nisur javën kryetari i Partisë së Lirisë, Ilir Meta i cili thuajse në çdo reagim apo dalje publike tregon se do të sjellë frymën opozitare në vend.

Meta shkruan se është “thirrje frymëzuese dhe buçitëse për largimin dhe ikjen pa kthim të armikut të së ardhmes së tyre, të grabitësit të miliarda euro të shqiptarëve dhe të tradhtarit të interesave tona kombëtare.”

Ndër të tjera vijoi duke shkruajtur se Armiku i Lirisë, Ligjshmërisë dhe Rinisë, do të japë llogari shumë shpejt përpara Drejtësisë dhe popullit për të gjitha dëmet kolosale, që i ka bërë vendit.

Video që u publikua nga Meta u realizua mbrëmë kur pati një moment që u shkëputën dritat dhe të rinjtë ia vunë fajin shtetit, por në një reagim, OSHEE sqaroi se ngarkesa e madhe e pajisjeve në koncert solli rënien e automatit, duke sjellë stakim të ndriçimit të një pjese të skenës, e cila menaxhohej nga organizatorët privatë.