TIRANË- Kryeministri Edi Rama i është përgjigjur sërish lajmeve të publikuara nga mediat, kësaj here sa i takon paketës fiskale 2023. Rama shkruan se mediat vazhdojnë të dizinformojnë qytetarët, pasi nuk është e vërtetë që do të ketë rritje të gjobave për biznesin e vogël, ashtu siç ato raportojnë.

“Shembull se si pasqyrat e dizinformimit mediatik dhe Aleanca e Rublave helmojnë për të ushqyer mërzinë: ”Protestë për rritjen e gjobave të biznesit të vogël”! JO, GËNJESHTËR.  Asnjë rritje gjobash s’ka për BV po ka për biznesin e madh, siç sugjeroi edhe Këshillimi Kombëtar”, shkruan Rama.

Rama thotë se rritja e gjobave do të jetë vetëm për biznesin e madh, nga 2 deri në 10-fish për të raste të evazionit.

Ndërkohë një ditë më parë disa biznese të vogla e të mesme ulën qepenët në shenjë proteste, duke i kërkuar qeverisë të mos aplikohet rritja e gjobave, përgjysmimin e taksave të karburantit dhe mosrritjen e çmimit të energjisë elektrike mbi fashën 800 kilovat. Por, shumë biznese nuk i janë përgjigjur kërkesës për ulje qepenësh.