Rama prezanton Sakon në Durrës, 'thumbon' Bashën dhe Berishën: Njëri thotë do i vëmë bravën Portit, tjetri varenë! Ne duam të vazhdojmë punën që qyteti të marrë një hov të ri

DURRËS- Në krah të ish-ministrit Ditmir Bushati, kryeministri Edi Rama prezantoi para të rinjve kandidaten për kryetare në Bashkinë e Durrësit, Emirjana Sakon. Rama tha se Sako, aktualisht kryetare e komanduar, ka treguar se iu qëndron pranë njerëzve në momente të vështira, ndërsa e theksoi të nevojshme votimin e saj për të vazhduar punët në qytetin e Durrësit, si portin e ri turistik por edhe tregun tregtar.

Përballë Emirjana Sakos, në Durrës Lulzim Basha ka vendosur Luan Hotin, ndërsa Sali Berisha Ardian Mukën. Por, sipas Ramës këta kandidatë ‘njëri ka dalë nga vrima e Ramës, tjetri nga bishti i varesë’.

“Duhet të zgjedhin mes Anit, një profesioniste, një njeriu të provuar, si një njeri që mund të ketë akoma për të mësuar por ka njerzëllëkun dhe modesitinë të rri afër njerëzve. Me dy tjerë që nuk i njoh që kush janë, por janë që janë dy burra. Njëri ka dal nga bishti varesë, tjetri nga vrima e bravës. Është shumë gjatë rruga për t’i rënë andej. Zgjedhja është shumë e qartë por pse është e rëndësishme, sepse me Anin do vazhdojmë punët që sapo kemi nisur. Unë kam dëshirë të bëj sëbashku me Anin dhe të tjetër çdo gjë që është e mundur që Durrësi të marrë një hov të ri. Po finalizojmë një marrëveshje që është historike për Shqipërinë, Durrësin, ndërtimi i porit të ri turistik, mos më i madhi në Mesdhe. Në një pikë që është port prej shumë shekujsh, në një vend ku pak metra më tutje është amfiteatri më i madh që romakët kanë ndërtuar jashtë Romës. Po punojmë për tregun e ri tregtar të Durrësit”, u shpreh Rama.

LEXO EDHE:
Ylli Pata: Legjendat elektoralo-amerikane të Sali Berishës

Rama ‘thumboi’ sërish Sali Berishën dhe Lulzim Bashën duke thënë se ata të dy e kanë problemin me portin e Durrësit. Sipas tij, njëri do t’i vërë bravën, ndërsa tjetri varenë. Por, Rama thotë se Partia Socialiste do që të vazhdojë punën dhe me portin e ri t’i sjelli qytetit të Durrësit një hov të ri.

“Nëse njeriu thotë ç’më duhet mua kush po zgjidhet, këtu vë në pikëpyetje këtë gjë. Edhe varreja edhe brave e kanë më portin, njëri thotë do i vëm bravën, tjerri varenë, ndërkohë që ne duam të ndërtojmë portin e ri. Kush e ndan këtë? Puna, po që të vazhdojë puna e ndan vota. Nuk do shkosh të votosh më të mirën, se nuk diskutohet më e mirë, por është votë për qytetin”, tha Rama.

Ndërkohë, ish-ministri Ditmir Bushati u bëri thirrje të rinjve të angazhohen në politikë dhe të bëhen pjesë e forcës politike më të madhe në vend, Partisë Socialiste për të sjellë ide të reja dhe për të treguar që socialistët i përshtaten sfidave të kohës.

“Kjo është shumë e rëndësishme për secilin prej jush për tu bërë pjesë e kësaj familje në mënyrë që familja jonë politike të ketë ide të reja, të ketë vitalitetin e nevojshme, transfuzionin e gjakut që është i nevojshëm për trupin por edhe PS. Dhe për të gjithë ne për të kuptuar që nuk mund të jesh socialist në 2022 me idetë e socialistëve pas luftës së dytë botërore apo me idenë e PS pas viteve 90 sepse sfidat janë të ndryshme dhe e rëndësishme është që ne të jemi një forcë dinamike që i përshtatemi kohës”, tha Bushati.

Sako kërkoi mbështetjen e të rinjve për t’i dhënë mundësinë Partisë Socialiste që të transformojë qytetin e Durrësit.

“Dua ta falënderoj kryeministrin për mbështetjen e madhe që bën për të rinjtë. Në PS çdo i ri mund të jetë pjesë e saj. Durrësi ka hapur nja kapitull të ri me projektet e tjera madhore që do ta tjetërsojnë si qytet. Me projektin e madh të portit, atë tregtar si edhe shumë e shumë investime të tjera në infrastrukturë, do kemi mundësi të hapim një front të ri për qytetin që do të ketë nevojë për të rinj të specializuar, intelektual të rinj. Kam besim se do kemi mbështetjen tuaj, do jeni pjesë e transformimit të qytetit të Durrësit”, tha Sako.

Rendit zhvillimet sipas orarit:

Të Fundit Të Parat

SI.E./G.MO/Shqiptarja.com

TAG:
• ditmir bushati
• Emirjana Sako
• zgjedhjet 6 mars 2022
• edi rama
• Durres