Rama me shqiptarët në New York: Shqipëria e sotme nuk është më vendi që ka nevojë për ndihma! Projektet për Sazanin e Zvërnecin, të jashtëzakonshëm

Vizitën në Shtetet e Bashkuara, kryeministri Edi Rama e mbylli me një takim me shqiptarët që jetojnë në “Staten Island”, në Nju Jork. Ai vlerësoi kontributin e diasporës në ekonominë shqiptare dhe i ftoi të investojnë përmes paketës së Maleve.

Të jashtëzakonshëm e vlerësoi kryeministri Edi Rama kontributin e diasporës për ekonominë shqiptare ndër vite. Për kryeministrin, lidhja mes Shqipërisë dhe Diasporës është forcuar gjatë viteve të fundit, pasi sipas tij, ka nisur ndërtimi i urave të bashkëpunimit, ku kalojnë interesa e investime.

“Pavarësisht se jemi në SHBA, ky është një territor jo i pushtuar zyrtarisht nga shqiptarët. Në vitin 2015 unë isha në një darkë shqiptarësh i ftuar, sëbashku me Hashim Thaçin dhe në atë darkë u diskutua për herë të parë ideja e atij që një vit më pas u bë Samiti i parë i Diasporës në Tiranë. 10 vite prej atij Samiti, besoj se kanë ndodhur plotë gjëra pozitive dhe lidhja e Shqipërisë me Diasporën është kthyer në një lidhje ku janë ngritur ura që kalojnë interesa, investime dhe plotë rikthime shqiptarësh në tokën ëmë. 90 % e familjeve shqiptare kanë përfituar të paktën njëherë nga dërgesat financiare të shqiptarëve të Diasporës. Ky është një nder i madh që do ta mbulojë me lavdi diasporën shqiptare të gjithë këtyre viteve. Por siç e thashë, nuk jemi më në atë fazë, kur diaspora jepte e Shqipëria merrte, por jemi në një tjetër fazë. Kemi nisur të krijojmë një regjistër kombëtar të Diasporës, për të gjitha ata që duan të investojnë sadopak në Shqipëri", tha mes të tjerash Rama.

LEXO EDHE:
Takimi me shqiptarët në New York, Rama ‘surprizohet’ me një tortë me simbolin e flamingove

Pas kaq vitesh, kreu i qeverisë tha se më në fund Shqipëria është në pozita më komode financiare, megjithatë e hapur për investime, siç është edhe paketa e maleve.

"Shqipëria nuk vuan më tani faktin që zogjtë e kafshët vriten dhe askush nuk shqetësohet për to. Shqipëria e sotme nuk është më Shqipëria në nevojë për ndihma. Sot Shqipëria ka hëpur një derë të re, derën e maleve të saj”, shtoi Rama.

Përballjen pak ditë më parë me disa protestues gjatë qëndrimit në Nju Jork, Rama e përcolli mes batutash.

"Ky ndryshim që ka ndodhur në këtë marrëdhënie, s’ka ndodhur thjeshtë aty ku ta rrok syri, por ka ndodhur në mendësi. Tani jeta është shumë më organike dhe pjesë e atij organiciteti ishin edhe vezët që m’u hodhën mua. Madje, një nga hedhësit e vezëve kishte ardhur nga Anglia për të hedhur vezë. Shpresoj të ketë kaluar mirë me Policinë e Nju Jork. Në trupën e mbrojtjes pastaj që u angazhua në çdo event, ishte një shqiptar që shërben në Policinë e Nju Jork. Prandaj unë u ndodha komplet në shtëpi, edhe Policia, edhe protestuesit. Këtu u prita me një tortë rozë, që kishte 2 flamingo si një zemër. Më erdhi mirë", vijoi Rama.

Duke folur për fluksin e vizitorëve të huaj, Rama tha se objektivi në vijim është 20 milionë turistë në vit. Ai theksoi se Shqipëria po synon turizmin e vlerës, për të sjellë ne vend pushues që shpenzojnë më shumë.

Duke i cilësuar si të jashtëzakonshëm investimet që pritet të realizohen në Sazan dhe Zvërnec, Rama tha se po kryhet studim për të vlerësuar risqet që projektet do të sjellin në mjedis.

Kreu i qeverisë u ndal edhe te investimi në Zvërnec, për të cilin tha se do t’i sjellë vendit të ardhura mjaft të larta dhe garantoi se po punohet intensivisht për të pasur një studim të detajuar edhe profesional të impaktit mjedisor.

“Projekti i Sazanit dhe Zvërnecit, një projekt që sjell vetëm në Zvërnec më shumë se 4 miliardë euro, në një ekonomi që në totalin e vet është 27 miliardë euro. Një projekt i jashtëzakonshëm për Shqipërinë. Është jashtëzakonisht delikat edhe në aspektin e ekuilibrit për mjedisin, prandaj ne po punojmë shumë për të pasur një studim për ndikimin dhe risqet në mjedis. Risqet reale dhe jo ato që prodhohen në rrjetet sociale nga sharlatanët e manipulatorët”, shtoi Rama.

R.Xh/Shqiptarja.com

TAG:
• resorti ne zvernec
• zvernec
• sazan
• New York
• shqiperia
• diaspora shqiptare
• SHBA
• edi rama