POP 5

Lajmet më të lexuara të 5 minutave të fundit

Opinion

Rasti 'Bujar Sheshi' dhe publikimi i bashkëpunëtorëve të Sigurimit

Kanë kaluar pothuaj tri dekada qysh nga shpërbërja e Sigurimit të Shtetit, dhe është mëkat i madh që dosjet e tij të përdoren edhe sot si mjet shantazhi dhe kontrolli ndaj politikanëve, zyrtarëve dhe njerëzve të medias. Për këtë arsye, do të ishte e udhës që të publikohen të gjithë emrat e ish-bashkëpunëtorëve dhe ish-punonjësve të sigurimit, që sot janë politikanë, zyrtarë apo gazetarë, analistë ose opinionistë.

Rasti 'Bujar Sheshi' dhe publikimi i bashkëpunëtorëve të Sigurimit

Anëtari i KLP, Bujar Sheshi

Disa muaj pasi ishte zgjedhur në Këshillin e Lartë të Prokurorisë, i propozuar nga Kryeprokurorja Marku, Bujar Sheshi morri pjesë në një votim shumë të rëndësishëm në këtë këshill. Ai votoi pro kthimit të prokurorit Hajdarmata në Prokurorinë e Krimeve të Rënda, nga e cila e kishte larguar Kryeprokurorja Marku. (Për kujtesë, Hajdarmata ishte prokurori që kishte mbrojtur në Kuvend kërkesën për arrestimin e Saimir Tahirit.)

Fill pas votimit të Sheshit në kundërshtim me vendimin e Kryeprokurores Marku, në media qarkulloi një dokument i Autoritetit për Informimin mbi Dokumentet e ish-Sigurimit të Shtetit, sipas të cilit një njeri me gjeneralitete të ngjashme me të Sheshit (por jo të njëjta) kishte qenë bashkëpunëtor i fshehtë i Sigurimit të Shtetit në vitin 1974 (në moshë të mitur). Kryetarja e Autoritetit (që ka qenë më parë një zv.ministre e Ramës) deklaroi se pavarësisht mospërputhjes së gjeneraliteteve, personi që ka qenë bashkëpunëtor i mitur i Sigurimit është në fakt Bujar Sheshi. Dhe Sheshi e ka paditur kryetaren dhe të gjithë Autoritetin për këtë gjë.

Se si do të përfundojë gjyqi mes tyre duhet t’ia lëmë kohës të na e tregojë, por një gjyq në opinionin publik ka ditë që zien.

Në mënyrë të ngjashme, para disa muajsh u bë një gjyq i tillë publik për një kandidat tjetër për Këshillin e Lartë të Prokurorisë. Një prokuror nga Durrësi, Autoriteti i Dosjeve e certifikoi si të pastër në lidhje me të kaluarën e tij para vitit 1990, dhe ai ishte gati të votohej si anëtar i KLP-së. Por opozita publikoi një faksimile të një dokumenti të firmosur nga prokurori, që tregonte se ai kishte qenë bashkëpunëtor i fshehtë i Sigurimit, kur kishte punuar në Portin e Durrësit.

Autoriteti i Dosjeve kërkoi falje publike për atë rast, duke u justifikuar se dokumentet ishin të shpërndara në shumë arshiva, dhe i kishte shpëtuar ky rast. Ndërsa në rastin e Bujar Sheshit kishte rrëmuar në të gjitha arshivat, dhe prandaj ishte vonuar disa muaj deri sa e verifikoi plotësisht atë. Por për rastësi, publikimi ndodhi pasi Sheshi kishte votuar kundër Kryeprokurores Marku…

Dy standardet e ndryshme të përdorura në këto raste të bëjnë të dyshosh se Autoriteti i Dosjeve nuk vepron jashtë ndikimit të korrenteve e përplasjeve politike të ditës. Dhe ky përbën një problem afatgjatë për politikën, administratën dhe median shqiptare. Në fakt, gjithkush mund të jetë i shantazhueshëm me dosjet që ka në barkun e tij ky autoritet, si ata që kanë qenë bashkëpunëtorë të Sigurimit, edhe ata që mund të kenë emra të ngjashëm me ish-bashkëpunëtorë.

Kanë kaluar pothuaj tri dekada qysh nga shpërbërja e Sigurimit të Shtetit, dhe është mëkat i madh që dosjet e tij të përdoren edhe sot si mjet shantazhi dhe kontrolli ndaj politikanëve, zyrtarëve dhe njerëzve të medias. Për këtë arsye, do të ishte e udhës që të publikohen të gjithë emrat e ish-bashkëpunëtorëve dhe ish-punonjësve të sigurimit, që sot janë politikanë, zyrtarë apo gazetarë, analistë ose opinionistë. Në këtë mënyrë dosjet e Sigurimit nuk mund të jenë më një mjet shantazhi.

Po sa besim mund të ketë publiku tek një listë e përpiluar nga Autoriteti i Dosjeve? Aktualisht ndoshta nuk ka, por në qoftë se atij i atashohet një ekspert gjerman, që është marrë me dosjet e Stasit, besimi mund të rritet (Për kujtesë, ekspertë gjermanë ishin ata që dhanë konsulencë për ligjin e dosjeve të Sigurimit).

Po a nuk do të shkelej e drejta e privatësisë së njerëzve që do t’u dilte emri në listën e bashkëpunëtorëve apo punonjësve të sigurimit? Në fakt ky ishte edhe shqetësimi i ekspertëve gjermanë, të cilët ishin kundër publikimit të emrave. Por besimi te Autoriteti i Dosjeve në Gjermani ishte i lartë, ndërsa në Shqipëri… Dhe në rastin kur ky besim nuk është i plotë, shoqëria duhet të vërë në peshë privatësinë e politikanëve, zyrtarëve e njerëzve të medias, nga njëra anë, dhe dëmin shoqëror që mund të bëjë shantazhimi i tyre me dosje të qena e të paqena, nga ana tjetër.

Dikush që ka qenë vërtetë bashkëpunëtor i Sigurimit mund të bëjë gjëra të dëmshme për shoqërinë, përderisa e urdhëron bosi që mund t’ia hapë petat lakrorit. Dikush tjetër që mund të mos ketë qenë bashkëpunëtor i Sigurimit, mund të sulmohet si i tillë në publik, kur bosave s’u pëlqen një qëndrim i tij. Dhe sa të sqarohet e vërteta nëpër gjyqe të stërgjatura ndër vite, dëmi është bërë…/AFP/

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    27 Nëntor, 11:43

    Si e vlerësoni vendimin e GJKKO që liroi Berishën nga arresti shtëpiak?

Lajme të tjera



×

Lajmi i fundit

Të burgosur prej vitesh në Kinë, lirohen tre amerikanët e burgosur, marrëveshja e rrallë diplomatike me Pekinin

Të burgosur prej vitesh në Kinë, lirohen tre amerikanët e burgosur, marrëveshja e rrallë diplomatike me Pekinin

27 Nëntor, 22:19