Ambasada SHBA: Akti i papranueshëm! Policia u vu në shënjestër të mjeteve piroteknike

Ambasada amerikane në Tiranë ka dënuar dhunën gjatës protestës së sotme të opozitës. Ajo thotë se sulmet me mjete piroteknike që vënë në shënjestër policinë janë të papranueshme dhe jodemokratike. Ambasada i bën një thirrje të drejtpërdrejtë liderëve të opozitës që të ndalojnë aktet e dhunshme dhe të angazhohen për nisjen e dialogut.

"Ambasada e SHBA dënon dhunën që ndodhi gjatë protestës sonte. Grumbullimi paqësor dhe e drejta për të shprehur pakënaqësitë ndaj qeverisë janë shtylla të demokracive të shëndosha, por janë të drejta që duhen ushtruar paqësisht. Përdorimi i mjeteve piroteknike, sidomos kur vënë në shënjestër policinë, nuk është akt paqësor, është i papranueshëm dhe jodemokratik. Iu bëjmë thirrje të gjithë organizatorëve të protestës të ndalojnë aktet e dhunshme dhe të angazhohen në dialog konstruktiv", reagon ambasada e SHBA-ve.

Ambasada e Britanisë së Madhe ka reaguar për protestën e sotme të opozitës.

“Mbretëria e Bashkuar mbështet të drejtën për të protestuar në mënyrë paqësore. Nuk ka vend për dhunë ose mjete piroteknike në një protestë paqësore.

Liderët e protestës kanë përgjegjësi të mbajnë demonstratat të sigurta dhe ligjore ndërsa policia ka përgjegjësi të përgjigjet në mënyrë proporcionale për ruajtjen e rendit publik.  

Për të mirën e të gjithëve, prioritet duhet të jetë një protestë paqësore dhe e sigurt”, thuhet në deklaratë.