Reagimi me fishekë gome i policisë, Bardhi: Të ndalet menjëherë, të hetohet çdo veprim i paligjshëm! Respektoni studentët

Deputetja demokrate Jorida Tabaku ka kërkuar një zgjidhje politike për situatën e tensionuar në vend, duke e cilësuar largimin e kryeministrit Edi Rama si domosdoshmëri për rikthimin e paqes sociale.

Në një reagim në rrjetet sociale, Tabaku akuzoi qeverinë se po nxit përplasjen mes qytetarëve, bizneseve dhe policisë, në vend që të adresojë shqetësimet e studentëve dhe krizën që po përjeton ekonomia dhe shoqëria shqiptare në tërësi.

“U bë dita e tretë që kryeministri, si lugat, del që në të gdhirë e më pas zhduket dhe flet për djegien e biznesit. Ata që e kanë djegur biznesin dhe kanë shkretuar Shqipërinë janë atje sot, duke e mbajtur pushtetin me zor. Shqipëria ka nevojë për një paqe sociale të re, ka nevojë për një zgjidhje politike, ka nevojë për largimin e Edi Ramës. Këto janë kërkesat e studentëve, këto janë kërkesat e biznesit”, tha mes të tjerash Tabaku.

Deputetja e Partisë Demokratike theksoi se qeveria ka përgjegjësi për mbylljen e bizneseve vendase dhe shtimin e vështirësive për sipërmarrësit shqiptarë.

“Ata që sot qajnë me lot krokodili, sikur u dhimbset biznesi, e kanë shkretuar biznesin vendas. Kanë sjellë 18 ligje me porosi, kanë vendosur TVSH-në për këto biznese të vogla, i kanë mbyllur ato masivisht dhe i kanë detyruar të emigrojnë”, u shpreh ajo.

Tabaku nënvizoi se bizneset nuk duhet të shihen si kundërshtare të qytetarëve, pasi përbëjnë një nga shtyllat kryesore të ekonomisë dhe nuk duhet të bëhen pjesë e një përplasjeje që rëndon më tej situatën në vend.

“Bizneset janë me qytetarët. Bizneset nuk duhen prekur. Bizneset duhen mbrojtur si shtylla kryesore e ekonomisë së Shqipërisë”, u shpreh Tabaku, duke nënvizuar se përgjigjja ndaj situatës nuk duhet të jetë përplasja mes qytetarëve dhe sipërmarrjes, por largimi i qeverisë.

Reagimi i plotë i Tabakut:

U bë dita e tretë që kryeministri, si lugat, del që në të gdhirë e më pas zhduket dhe flet për djegien e biznesit. Ata që e kanë djegur biznesin dhe kanë shkretuar Shqipërinë janë atje sot, duke e mbajtur pushtetin me zor.

Shqipëria ka nevojë për një paqe sociale të re, ka nevojë për një zgjidhje politike, ka nevojë për largimin e Edi Ramës. Këto janë kërkesat e studentëve, këto janë kërkesat e biznesit.

Ata që sot qajnë me lot krokodili, sikur u dhimbset biznesi, e kanë shkretuar biznesin vendas. Kanë sjellë 18 ligje me porosi, kanë vendosur TVSH-në për këto biznese të vogla, i kanë mbyllur ato masivisht dhe i kanë detyruar të emigrojnë.

Sot, studentët janë duke protestuar për disa kërkesa të drejta. Janë duke protestuar për largimin e kryeministrit, kundër dhunës, kundër korrupsionit, kundër krimit të organizuar, kundër largimit. Dhe kjo kërkon marrjen e një vendimi politik për largimin e Edi Ramës.

Sot, bizneset, të rinjtë, qytetarët, po edhe policët, janë lënë në mëshirë të fatit. Sepse sot nuk ka as ministër të Brendshëm, as Polici të Shtetit, as ministra që janë në detyrë. Nuk ka as kryeministër.

Ata kanë nxitur pikërisht këtë konflikt social për t’i vendosur bizneset përballë qytetarëve dhe policinë, nga ana tjetër, përballë qytetarëve, duke i vendosur njerëzit kundër njëri-tjetrit.

Kjo kërkon largimin e Edi Ramës, për plotësimin e kërkesës së parë të studentëve dhe të qytetarëve.

Bizneset janë me qytetarët. Bizneset nuk duhen prekur. Bizneset duhen mbrojtur si shtylla kryesore e ekonomisë së Shqipërisë, që është duke vuajtur sot. Por nesër do të jetë më mirë vetëm me largimin e kësaj qeverie.

Sekretari për të Drejtat e Njeriut në Partinë Demokratike, Franc Nuri i është drejtuar publikisht Policisë së Shtetit dhe drejtuesve të saj, duke kërkuar hetim të menjëhershëm, të pavarur dhe të plotë për të gjitha pretendimet për dhunë të Policisë së Shtetit ndaj protestuesve.

Në një deklaratë për mediat, Nuri ka ngritur akuza për përdorim të forcës ndaj protestuesve të rrëzuar në tokë, goditje me shkopinj gome dhe shqelma si dhe keqtrajtim të personave që, sipas tij nuk përbënin rrezik për efektivët.

Nuri ka theksuar gjithashtu se çdo rast i pretenduar i përdorimit të paligjshëm të forcës duhet të hetohet dhe se personat përgjegjës duhet të mbajnë përgjegjësi në përputhje me ligjin.

DEKLARATA

Të nderuar qytetarë,

Përgjigjja e pushtetit të Edi Ramës kundër protestës është tronditëse: dhunë e egër, brutale dhe shtazarake ndaj gjimnazistëve, studentëve dhe qytetarëve që protestojnë!

Kemi parë skena që nuk duhet të ndodhin kurrë në një shtet demokratik!

Policë që godasin me shkopinj gome dhe shqelma të rinj të rrëzuar përtokë. Efektivë që mbledhin gurë nga rruga dhe i hedhin drejt protestuesve. Adoleshentë që kapen nga fyti, protestues që tërhiqen zvarrë, goditen nga pas dhe dhunohen edhe pasi janë neutralizuar, kur nuk përbëjnë më asnjë rrezik!

Edhe më tronditëse janë denoncimet për dhunë ndaj personave të pambrojtur, që nuk sulmonin askënd, ndaj qytetarëve që qëndronin në rrugë apo kalimtarëve që thjesht gjendeshin në vendin e gabuar, në momentin e gabuar!

Familjarët e Muhamet Skanës denoncojnë dëmtime të rënda në kafkë dhe shtyllën kurrizore pas dhunës policore.

Çfarë është kjo polici që godet një njeri të rrëzuar? Çfarë shteti përdor gurët dhe shkopinjtë e gomës kundër rinisë së vet?

Por skandali nuk përfundon këtu!

Në Bllokun e Sigurisë në rrugën “Mine Peza”, sipas denoncimeve, mbahen dhjetëra protestues, mes tyre shumë të mitur, në kushte të rënda! Raportohet për të rinj të rrahur e të dhunuar, si dhe për autoambulanca që hyjnë e dalin nga ambientet e ndalimit.

Çfarë po ndodh brenda atyre dyerve të mbyllura? Çfarë po u bëjnë fëmijëve, gjimnazistëve dhe studentëve tanë?!

Përse kjo dhunë? Për një rrogë? Për një urdhër? Apo për të mbajtur në pushtet Edi Ramën dhe sistemin e tij?

Por kjo dhunë nuk ka kursyer as gazetarët!

Gazetari Elkier Bushkolaj dhe fotoreporteri Feliks Bilani janë përballur me ndërhyrje të dhunshme policore. Një reporter i një mediaje të huaj, sipas pamjeve të publikuara, është rrëzuar përtokë dhe goditur me shkopinj gome!

Madje, as turistët e huaj nuk janë kursyer nga ndërhyrjet arbitrare. Një turist amerikan ka denoncuar se është ndaluar dhe frikësuar në qendër të Tiranës nga persona me veshje të zeza, pa shenja të dukshme identifikimi.

Kjo është fytyra e pushtetit që denoncojmë sot: studentë të goditur, gazetarë të penguar, qytetarë të pambrojtur të keqtrajtuar dhe turistë të huaj të frikësuar!

I drejtohem sot publikisht Policisë së Shtetit dhe drejtuesve të saj:

Uniforma nuk ju jep të drejtën të dhunoni qytetarët! Asnjë urdhër politik apo administrativ nuk ju përjashton nga përgjegjësia ligjore!

Çdo efektiv që ka ushtruar dhunë të paligjshme, çdo drejtues që e ka urdhëruar, lejuar apo mbuluar atë, duhet të hetohet dhe të mbajë përgjegjësi deri në fund!

Asnjë shkop gome, asnjë goditje pas shpine, asnjë akt arbitrar nuk duhet të mbetet pa hetuar dhe pa ndëshkimin që parashikon ligji!

Partia Demokratike kërkon hetim penal të menjëhershëm, të pavarur dhe të plotë, identifikimin e përgjegjësve në çdo nivel të zinxhirit komandues, hetimin e kushteve të mbajtjes së të miturve dhe ruajtjen e të gjitha provave filmike.

Partia Demokratike, do t’ua përcjellë që këto pamje dhe dëshmi organizatave ndërkombëtare të të drejtave të njeriut, organizatave për mbrojtjen e gazetarëve dhe institucioneve europiane.

Edi Rama dhe qeveria e tij duhet të japin llogari për dhunën ndaj rinisë shqiptare! Policia e Shtetit dhe përgjegjësit individualë duhet të japin llogari për çdo shkelje të ligjit!

Për Partinë e Lirisë, përshkallëzimi i revoltës është e vetmja rrugë dhe e vetmja zgjidhje për të rrëzuar qeverinë e kryeministrit Edi Rama.

Sekretari i përgjithshshëm i kësaj force politike, Tedi Blushi, në një deklaratë për mediat thotë se largimi i Ramës nga pushteti është kusht për rikthimin e normalitetit demokratik, ndërsa bën thirrje të mos bëhet asnjë hap pas dhe që të gjithë të solidarizohen me studentët.

Duke i cilësuar këto orë si vendimtare për Shqipërinë, Blushi u ka bërë thirrje të gjithë qytetarëve që t’u bashkohen protestave të dhunshme që po zhvillohen në Tiranë, por edhe në qytete të tjera të vendit.

Reagimi i plotë i Blushit:

Partia e Lirisë shpreh solidaritetin e plotë me studentët dhe gjimnazistët që janë ngritur në protestë historike për lirinë, demokracinë, dinjitetin, të drejtat dhe të ardhmen e tyre.

Beteja e tyre është beteja e çdo të riu, e çdo pedagogu, e çdo prindi dhe e çdo shqiptari që refuzon të jetojë nën Narkoregjimin kriminal të dhunës, arbitraritetit dhe korrupsionit që ndërtoi Edi Rama.

Këto janë orë dhe ditë vendimtare për çlirimin e Shqipërisë nga një regjim barbar, që duhet shporrur një orë e më parë.

Përballë një regjimi gjakatar, solidariteti me studentët është më i domosdoshëm se kurrë.

Përshkallëzimi dhe vetëm përshkallëzimi i revoltës është e vetmja rrugë dhe e vetmja zgjidhje për t’u çliruar përgjithmonë nga një organizatë kriminale që qeveris me dhunë, nuk ngopet me vjedhje dhe kërkon të qëndrojë në pushtet me gjakosjen e të rejave dhe të rinjve të Shqipërisë.

Partia e Lirisë dënon me vendosmëri dhunën çnjerëzore fashiste, torturat kolektive naziskine, gjakosjen barbare të ushtruar nga Narkopolicia ndaj studentëve, studentëve, gjimnazistëve dhe qytetarëve.

Keqtrajtimet brutale, rrahjet, rrëmbimet dhe arrestimet e paligjshme dhe përdorimi brutal i dhunës kundër të rinjve që protestojnë janë akte thellësisht kriminale, që kanë për autor dhe urdhërdhënës vetëm Edi Ramën, pushteti i të cilit meriton të shkërmoqet dhe të shembet nën këmbët e studentëve dhe të sovranit.

Rekrutimi i banditëve dhe mercenarëve të maskuar, që ushtrojnë dhunë në emër të Narkoshtetit dhe janë gati të derdhin gjak për mbrojtjen e karriges së Edi Ramës e bën të domosdoshme bashkimin dhe solidaritetin me studentët.

Nuk ka shtet ligjor me maska dhe nuk ka rend demokratik kur banditë dhe mercenarë të paguar me paratë e zeza të korrupsionit dhe krimit të organizuar përdoret për të terrorizuar qytetarët, për të mbjellë panik dhe kaos.

Terrori i maskave të banditëve dhe mercenarëve të mafias nuk është shenjë forcë por tregues i panikut të Narkoregjimit gjakësor të Edi Ramës, në orët dhe ditët e fundit.

Partia e Lirisë i bën thirrje çdo të riu, çdo studenti e gjimnazisti, çdo pedagogu, çdo mësuesi, çdo prindi dhe çdo shqiptari që të qëndrojë në krah të protestës dhe të dalë masivisht në çdo rrugë, në çdo lagje, në çdo shesh dhe në çdo qytet të Shqipërisë.

Sot, më shumë se kurrë, kërkohet solidaritet, guxim dhe qëndresë e pandalshme qytetare dhe përshkallëzim të protestës dhe revoltës.

Studentët po mbrojnë jo vetëm të ardhmen e tyre, por edhe dinjitetin e shoqërisë dhe të drejtën për të jetuar në një Shqipëri të lirë.

Përballë dhunës fashiste dhe arrogancës kriminale të Narkopushtetit, heshtja dhe indiferenca nuk është zgjidhje.

Është koha që të gjithë shqiptarët të bashkohen kundër një regjimi mafioz që kërkon të vazhdojë të sundojë përmes frikës, dhunës dhe hajdutërive të panumërta.

Edi Rama është piromani i Tiranës dhe i gjithë Shqipërisë.

Me Edi Ramën nuk mund të ketë as paqe dhe as negociata politike!

Nuk mund të ketë kompromis me Narkoshtetin, me mafian, me bandat, me kartelet e drogës, me dhunën dhe korrupsionin.

As normalitet demokratik për sa kohë qytetarët shtypen me dhunë dhe të rinjtë keqtrajtohen barbarisht për shkak se protestojë për liritë dhe të drejtat e tyre themelore.

Edi Rama është përgjegjësi dhe autori kryesor i shpopullimit dramatik të Shqipërisë, i dëbimit me dhunë të të rinjve, për plaçkitjen e financave dhe pasurive private e publike të shqiptarëve.

Edi Rama është armiku më i egër i shqiptarëve dhe i shtetit të së drejtës, pengesa kryesore për integrimin europian të vendit.

Edi Rama është e keqja më e madhe për të ardhmen e Shqipërisë.

Largimi i tij nga pushteti është kusht për rikthimin e normalitetit demokratik.

Të gjithë në këmbë në mbështetje të studentëve për të shembur nën këmbët e tyre dhe të sovranit narkoregjimit mafioz, më të pabesë dhe antishqiptar të Edi Ramës.

Antishqiptari dhe i pabesi, Edi Rama, plaçkitësi më barbar i Shqipërisë, pronave dhe miliarda eurove të shqiptarëve, që sot bën sikur i qan shpirti për pesë xhama të thyer dhe hap rubrikën e hipokrizisë “dëmi im”, duhet të marrë përgjigjen e merituar për dëmin e pallogaritshëm që u ka bërë shqiptarëve, Shqipërisë dhe kombit shqiptar.

Largimi i Edi Ramës është kusht i panegociueshëm për shpëtimin e Shqipërisë.

Asnjë hap pas!

Të gjithë në krah të studentëve!

Të gjithë në mbrojtje të lirisë, demokracisë dhe dinjitetit njerëzor, në mbrojtje të Shqipërisë dhe të kombit!

Triumfi i lirisë është më pranë se kurrë!