La Liga spanjolle e futbollit është në javën e shtatë. Pasi dje Barcelona u ndal 2-2 në udhëtim me Mallorcan, nga një gje e tillë përfitoi Real Madridi. “Galaktikët” hodhën pas humbjen 3-1 në derbin me Atl. Madrid dhe këtë mbrëmje fituan 2-0 në shtëpi kundër Las Palmas.

Të besuarit e Carlo Ancelottit shënuan golin e parë me Brahim Diaz në minutën e 45+2, duke e mbyllur pjesën e parë në avantazh. Më pas në fraksionin e dytë ishte Joselu në të 54 minutë që shënoi golin e qetësisë. Kësisoj me këtë sukses Real Madridi ngjitet në kuotën e 18 pikëve për vendin e dytë.

Në sfidat e tjera, Bilbao dhe Getafe barazuan 2-2. Surprizën sërish këtë javë e bëri Girona, me katalanasit që fituan 1-2 kundër Villarreal në udhëtim. Golat e Dovbyk dhe Garcias përmbysën vendasit, teksa tanimë pas shtatë javësh Girona kryeson La Ligan me 19 pikë, një më shumë se Real Madrid dhe dy më shumë se Barcelona.