Reçel me patëllxhanë

Përbërësit:

  • Patëllxhanë të vegjël
  • 1 limon
  • 1 lugë çaji kripë
  • 1 lugë gjelle sodë buke
  • 1 shkop kanelle
  • 4-5 karafila
  • 200 ml ujë i ftohtë
  • Sheqer (sipas sasisë së patëllxhanëve)
  • Lëngu i gjysmës së një limoni

Përgatitja:

Qërojmë patëllxhanët dhe bëjmë disa vrima të vogla me majën e thikës që të thithin shurupin sa më mirë. Në një enë me ujë të bollshëm, shtojmë 1 lugë çaji kripë dhe 1 lugë gjelle sodë buke. Ziejmë patëllxhanët për pak minuta (derisa të zbuten lehtë), vendosim një pjatë sipër që t’i mbajë nën ujë. I lëmë të qëndrojnë gjatë natës në këtë përzierje. Të nesërmen, i kullojmë dhe i shpëlajmë 3–4 herë me ujë të bollshëm. Në një tenxhere të madhe hedhim sheqerin dhe 200 ml ujë të ftohtë dhe e lëmë të vlojë derisa sheqeri të shkrihet plotësisht. Shtojmë patëllxhanët dhe vendosim përsëri pjatën sipër që të qëndrojnë nën shurup. I lëmë të ziejnë me zjarr mesatar për rreth 1.5 orë. Largojmë  pjatën, shtojmë karafilat dhe shkopin e kanellës. E lëmë reçelin të ziejë edhe 10–15 minuta të tjera. Më pas shtojnë lëngun e gjysmës së një limoni dhe e lëmë edhe 5 minuta. E heqim nga zjarri dhe e lëmë të ftohet. Mund të shërbehet si ëmbëlsirë me akullore, krem pana, ose me arra të copëtuara sipër.

Këshilla nga Albana: Nëse patëllxhanët janë më të mëdhenj, mund t’i presësh në copa më të vogla para se t’i vësh në shurup. Kur përgatitet siç duhet, reçeli del i tejdukshëm, aromatik dhe me teksturë të butë që nuk shpërbëhet.