Të gatuajmë me Zonjën Vjollca: Fileto pule me patate e brokoli dhe sallatë me kuinoa

Fileto pule me brokoli dhe patate

Përbërësit:

600 gr fileto pule

700 gr patate

400-500 gr brokoli

4 thelpinj hudhër

150 gr krem kosi

4 kokrra vezë

50 gr parmixhan

3 lgj gjelle vaj ulliri

Kripë dhe piper i zi

Trumzë, rozmarinë

Përgatitja:

Fillimisht lajmë mirë patatet dhe i vendosim të ziejnë jo plotësisht (për rreth 20 minuta) në një tenxhere me ujë dhe kripë. Brokolin gjithashtu e vendosim në ujë të vluar me kripë për 3 minuta dhe më pas e vendosim në ujë me akull që të mos zbutet më shumë.

Presim filetot e pulës në copa me gjatësi 3 cm. Vendosim një tigan në zjarr me vaj ulliri Olitalia, një thelpi hudhër dhe  1 degë rozmarinë për të aromatizuar vajin. Vendosim copat e pulës, largojmë thelpinjtë e hudhrës  dhe kaurdisim filetot e pulës derisa të zverdhen lehtë nga të dy anët. Rregullojmë shijen me kripë dhe piper të zi.

Qërojmë patatet dhe i presim në feta rrumbullake me trashësi 0.5 mm. Lyejmë një tavë me vaj ulliri dhe vendosim fetat e patateve (të vendosura si tjegullat) në një rrjesht si kolonë, më pas vendosim një rrjesht kolonë me brokoli dhe një kolonë me mish pule. Vazhdojmë më pas përsëri me 3 kolona të tjera patate – brokoli- mish pule.

Një një tas rrahim vezët dhe shtojmë pak nga pak kremin e kosit si dhe hudhrat të shtypura, kripë, piper të zi dhe trumzë. I përziejmë mirë të gjithë përbërësit derisa të formohet një salcë e lidhur.

Pudrosim perimet me pak djath parmixhano dhe më pas i mbulojmë me salcën e përgatitur. E pudrosim përsëri tavën me djath parmixhano dhe e vendosim në furrë në temperaturën 180 gradë Celsius për 25-30 minuta.

Receta e dytë: Sallatë me kuinoa

Përbërësit:

1 filxhan çaji kuinoa

1/2 qepë e kuqe

1 kastravec

1/2 spec i verdhë

2 domate mesatare

1 degë selino

1 tufë majdanoz

Nenexhik

1 e 1/2 limon

1 avokado

Kripë

Vaj ulliri

Përgatitja:

Shpëlajmë mirë kuinoan në një sitë. Ziejmë 2 masa ujë dhe shojmë në të 1 masë kuinoa. Pra raporti është 1 masë kuinoa për 2 masa ujë të valuar. E ziejmë në temperaturë mesatare duke e mbuluar me kapak për 15-20 minuta. E thërrmojmë me pirun dhe e lëmë të ftohet.Ndërkohë përgatisim dresingun. Vendosim në tas pak lëkurë limoni, 6 lugë gjelle lëng limoni, 1 thelp hudhër, 1 lugë kafe sheqer, vaj, kripë, piper dhe i përziejmë mirë deri sa të formohet salca.Të gjitha perimet, qepën, kastravecin, specin, domaten dhe selinonë i presim në kubikë shumë të vegjël.Grijmë hollë majdanozin dhe nenexhikun. I përziejmë mirë perimet së bashku dhe i marinojmë me gjysmën e salcës. Avokadon e presim në kubikë dhe e përziejmë me pak dresing.marrim një formë dhe si bazë vendosim avokadon si shtresë të parë. Përziejmë kuinoan me perimet dhe shtojmë në të dhe dresingun. I përziejmë mirë dhe shtojmë mbi avokadon që vendosëm në formë sallatën me kuinoa. E zbukurojmë sipër me majdanoz dhe domate. E largojmë formën dhe e shërbejmë.