TIRANË – 24 partitë politike, të cilat bashkë me PS e PD kërkojnë ndryshime ne kodin zgjedhor I bënë sot apel të dy partive të mëdha të mos vonojnë më shqyrtimin e propozimeve të tyre.
Të mbledhur në një tryezë, drejtuesit e këtyre partive thanë se çdo vonesë do të dëmtonte procesin e reformës zgjedhore.

MILO: TË SHQETËSUAR PËR VONESAT
Kreu i PDS, Paskal Milo u shpreh i shqetësuar për vonesat në shqyrtimin e kërkesave për korrektim të sistemit kombëtar dhe të kritereve për shpërndarjen e mandateve.

“Kjo është një kërkesë shumë e drejtë që kërkon barazinë e votës së qytetarëve. Komisioni i Reformës Zgjedhore duhet ta marrë sa më shpejt në shqyrtim, do t’i bënte mirë klimës politike”, tha Milo.

MEDIU: BARAZIA E VOTËS, KRITER PËR HYRJEN NË KUVEND
Për kryetarin e PR, Fatmir Mediu ka ardhur momenti që Partia Demokratike dhe ajo Socialiste të mbajnë një qëndrim në lidhje me kërkesën e partive të vogla.
“Kërkojmë që përfaqësimi të bazohet në barazinë e votës. Kemi paraqitur 4 variante të ndryshme për këtë çështje, të cilat nuk cënojnë Kushtetutën”, tha ai.


GJINUSHI: NDRYSHIMET NUK PREKIN KUSHTETUTËN
Pët kreun e PSD, Gjinushi plotësimi i kërkesave të partive të vogla, përmbush rekomandaimet e OSBE – ODIHR.
“Zgjedhjet kanë dështuar se nuk ka pasur konsensus për reformën. Nuk duhet të ketë më deformim të votës”, tha ai.



META E IDRIZI: PS E PD MOS HUMBIN MË KOHË
“Partia Demokratike dhe partia Socialiste duhet t’i qëndrojnë draftit që firmosën më 23 prill’, tha Meta. Edhe kryetari i PDIU-së, Shpëtim Idrizi theksoi rëndësinë që reforma zgjedhore të përfundojë në kohë dhe të jetë e drejtë dhe e barabartë për të gjitha forcat politike.

NDOKA: DY PARTITË PO TREGOHEN JO SERIOZE
“Është momenti për kompromis politik, për konsensus mes palëve. Partia Demokristiane është pro ligjit që lejon të votojmë të gjithë si të barabartë. Por vërejmë që partitë kryesore kanë mungesë korrektësie dhe dëshire për ta dërguar këtë kërkesë në Kuvend e KQZ”, tha kryetari i PDK.



KOÇI: TË ZYRTARIZOHET DRAFTI
Kryetari i PSV91, Petro Koci deklaroi tha se është me shumë rëndësi që të gjitha partitë që e firmosën draftin, t”i mbeten besnik atij.
“Sistemi aktual betonizon mos ndryshimin e pushtetit”, përfundoi Koçi.

(aq/shqiptarja.com)