Reforma zgjedhore, Report Tv zbardh draftin! PS-PD dakordësi për 2/3 e listës së hapur dhe votën e emigrantëve! Mblidhen 'Ligjet'

TIRANË- Në Komisionin e Ligjeve po diskutohet drafti i dakordësuar mes PS dhe PD për reformën zgjedhore. Report Tv dhe Shqiptarja.com ka siguruar draftin që është hartuar mes dy palëve, ndërsa kanë rënë dakord që 2/3 e listës së deputetëve të jetë e hapur dhe 1/3 të jetë ekskluzivitet i kryetarit të partisë. Palët po ashtu kanë arritur dakordësi për votën e emigrantëve.

Dy partitë politike kryesore të vendit, Partia Socialiste në qeveri dhe Partia Demokratike në opozitë, duket se kanë rënë dakord që të mbajnë me lista të mbyllura shumicën dërrmuese të mandateve të deputetëve edhe në zgjedhjet e ardhshme për parlament të parashikuara për vitin 2025, ndërsa votuesit e secilës parti do të mund të zgjedhin me votë pëlqyese më pak se një të tretën e kandidatëve.

Si do të bëhet shpërndarja e mandateve?
Referuar variantit të dakordësuar për herësin  1/3 e listës së kandidatëve do të jetë e fiksuar, pra do të përcaktohet nga kryetari i partisë, ndërsa 2/3 e listës do të jetë e hapur dhe kandidatët për deputetë në këtë listë do të garojnë mes njëri-tjetrit për të fituar mandatiet fituese ata me me votat më të larta parapëlqyese. 

Ndërsa referuar ndryshimeve që priten të miratohen dhe janë në draftin e përbashkët kandidati për deputet, i regjistruar në listën e fiksuar të partisë politike apo koalicionit nuk mund të jetë njëkohësisht edhe në listën shumëemërore të kandidatëve për deputetë që i nënshtrohen votimit parapëlqyes. Ky sistem që pritet të aplikohet për herë të parë në zgjedhjet parlamentare të 2025.

Shembull: Qarku i Tiranës ka 36 madate, 1/3 e listës së çdo subjekti zgjedhor do të renditet në listën fituese, pra 12 deputetë. 12 kandidatët e renditur nga kryetari i partisë në listën fikse e kanë të sigurt mandatin e deputetit dhe vetëm nëse partia arrin të sigurojë më shumë se 12 mandate (shembull:+ 4 mandatate të tjera) , gara për këto mandate do të zhvillohet mes kandidatëve të renditur në listën e hapur, duke përcaktuar fitues këtë herë 4 më të votuarit. 

Nuk ka me "favore" per kryetaret, kandidohet vetëm në 1 qark
Po kështu në këtë draft nuk ka më 'favore' për kryetarët. Ndryshe nga zgjedhjet e 2021 kur kryeministri Edi Rama kandidoi në Vlorë e Durrës, apo Monika Kryemadhi kandidoi në qarkun Tiranë e Fier, tani me ndryshimet nuk do jetë më kjo. 

Në nenin 67 në pikat 4  e 5 thuhet

"Kandidati për deputet, i regjistruar në një listë shumemërore në një zonë zgjedhore, nuk mund të regjistrohet si i tillë për një zonë zgjedhore tjetër, qoftë edhe për llogari të një partie apo koalicioni tjetër dhe as si i propozuar nga një grup zgjedhësish"  

Kandidati për deputet, i rregjistruar në listën e fiksuar të partisë politike apo koalicionit nuk mund të jetë njëkohësisht edhe në listën shumëemërore të kandidatëve për deputetë që i nënshtrohen votimit parapëlqyes.

Një ndryshim tjetër është edhe heqja e pragut 1% në rang kombëtar për kandidatët e pavarur.

Vota e diaspores
Sipas draftit përfundimtar sa i takon votës së emigrantëve KQZ drejton mbikëqyr dhe është përgjegjëse për procesin për përgatitjen e zgjedhjeve gjithashtu organizon votimin. Çdo ent tjetër shtetëror ose privat që përfshihet në këtë proces janë të detyruar të zbatojnë rregullat e përcaktuara në këtë Kod dhe në aktet nënligjore që miraton KQZ-ja në zbatim të tij.

Edhe rregjistrimi elektronik i zgjedhësve jashtë do të realizohet nga KQZ-ja. Procesi i hartimit të listës fillon 120 ditë para datës së zgjedhjeve dhe përfundon 60 ditë para kësaj date. Zgjedhësi paraqet dokumentacion që vërteton qëndrimin e tij jashtë territorit të Republikës së Shqipërisë. Në momentin e regjistrimit automatikisht crregjistrohet në listën e zgjedhësve brenda vendit. Votimi do të bëhet përmes postës. KQZ dërgon fletën e votimit në adresën e deklaruar të vendbanimit të zgjedhësit sipas listës së zgjedhësve dhe më pas votuesi e dërgon të plotësuar dhe e sekretuar në adresën zyrtare të KQZ, nëpërmjet shërbimit postar me shpenzimet e zgjedhësit.

Fletët e votimit në momentin e mbërritjes në KQZ rregjistrohen ne një rregjistër të posaçëm dhe ndahen sipas zonës zgjedhore të vendbanimit më të fundit të zgjedhësit para largimit nga Shqipëria. Procesi i numërimit të tyre fillon në të njëtin moment që fillon numerimi i kutisë së parë me fletë votimi të zonës zgjedhore përkatëse dhe vlerësimi i tyre kryhet nga administrata e KQZ-së dhe tabelohen në tabelën e rezultateve të zonës zgjedhore përkatëse.

(Kliko këtu për të lexuar dokumentin e plotë) Drafti

Ndryshimet në kodin zgjedhor/ Varianti i PS-së, varianti i PD -së dhe varianti i dakordësuar

Rendit zhvillimet sipas orarit:

Të Fundit Të Parat

S.G/E.B/Shqiptarja.com

TAG:
• gazment bardhi
• Bledi Cuci
• reforma zgjedhore