TIRANË- Partia Demokratike nis përgatitjet për fushatë me një platformë për ringritjen e ekonomisë. Kryedemokrati Lulzim Basha në përfundim të mbledhjes me kryesinë e Partisë, e cila ka zgjatur për më shumë se 1 orë, u shpreh se demokratët kanë gati një platformë për ringritjen e ekonomisë e cila do të prezantohet në të gjithë vendin. Ai është shprehur i bindur se PD do të fitojë zgjedhjet e ardhshme.

“Sfida më e madhe e çdo familje, e çdo shqiptari, është kriza ekonomike. Kjo krizë nuk mund të zgjidhet nga ta që zhvatën Shqipërinë. Ndaj e gjithë vëmendja jonë është tek e ardhmja. Ndaj PD dhe opozita e bashkuar janë të vendosur të paraqesin platformën ekonomike kudo në Shqipëri. Ne do t’i fitojmë zgjedhjet, do të kemi në fokus ringritjen ekonomike. Ky do të jetë përqendrimi i gjithë energjive tona. Do përqendrojmë gjithë energjinë tonë te fitorja e zgjedhjeve të ardhshme dhe zgjidhja e krizës së rëndë ekonomike, duke iu ofruar planin tonë shqiptarëve, për t’u kthyer ekonominë atyre”, tha Basha.

Ndërkohë, nga mbledhja me Kryesinë është Basha është tërhequr nga plotfuqia e listave të kandidatëve për deputetë, për të cilën mori kritika të forta në zgjedhjet e 2017-s. Burime zyrtare nga selia blu bënë me dije se nga data 20 qershor do të nisë përzgjedhja e kandidatëve sipas parimit “Një anëtar, një votë”. Lulzim Basha, i propozoi sot kryesisë nisjen e procesit të përzgjedhjes, konsultimit dhe seleksionimit te kandidaturave për zgjedhjet parlamentare dhe vendore.

“Vendimi i zotit Basha është një risi për politikën, pasi për herë të parë kandidatët për deputetë dhe kryetarë bashkie do të kenë votën e anëtarësisë së Partisë Demokratike. Përfshirja e anëtarësisë në përzgjedhjen e kandidatëve politikë të PD është një detyrim që u përfshi në statutin e PD me kërkesë të kreut të opozitës, si konkretizim i premtimit të tij se ai nuk do të bënte më kurrë i vetëm listën e kandidatëve për deputetë apo për kryetarë bashkie. PD është e vetmja parti që po zbaton parimin “një anëtar, një votë” për përzgjedhjen e kandidatëve për deputetë. “, thotë selia blu.

Procesi pritet të nisë nga 20 qershori deri në 15 shtator. Ky takim vjen dy ditë pasi i arrit marrëveshja për Reformën Zgjedhore me konsensus, e për të cilën mazhoranca tha se u tërhoq nga kërkesa e saj me qëllim që PD-ja të futjen në zgjedhjet e ardhshme parlamentare.