Regjistrimi i kontratave të pronave, afatet dhe gjobat (VIDEO)

Në emisionin “Këndi i Ekspertit”, në Report TV, të drejtuar nga gazetarja Valbona Mhilli, në Rubrikën “Prona Ime” ka qenë i ftuar eksperti i çështjeve të pronave Gjergji Begaj, drejtues i Studios Ligjore “Bylis”. Eksperti ynë ka folur për për kërkesat për regjistrim të pronave, për kamatë-vonesat. Begaj ka sqaruar se çfarë duhet që të kenë parasysh qytetarët që të mos penalizohen me gjobë dhe se sa ditë kalendarike është afati i mbylljes së çdo kontrate që regjistrohet pranë zyrave të Kadastrës. Ai ka shpjeguar edhe se çfarë dokumentesh duhet që të paraqesin qytetarët për regjistrim, pranë zyrave të Kadastrës. Më pas Gjergji Begaj u është përgjigjur pyetje që kanë mbërritur nga qytetarët live në Report TV.

Sot do të flasim për kërkesat për regjistrim, për kamatë-vonesat, neni 25. Çfarë duhet që të kenë parasysh qytetarët që të mos penalizohen me gjobë? Sa ditë kalendarike është afati i mbylljes së çdo kontrate që regjistrohet pranë zyrave të Kadastrës?

Cilat kontrata penalizohen dhe sa arrin vlera e gjobës?

Çfarë dokumentesh duhet që të paraqesin qytetarët për regjistrim, pranë zyrave të Kadastrës?

Kjo është një temë me vlerë dhe shumë e rëndësishme për qytetarët sepse një pjesë prej tyre neglizhojnë dhe penalizohen, gjithmonë në lidhje me çështjet dhe me kontratat e pronësive. Pra, gjithmonë flasim për kontratat që kanë lidhje me çështjet e pronësive.

Çfarë duhet të kenë parasysh qytetarët që të mos penalizohen me gjobë?

Që nga momenti kur një qytetar është i interesuar për të blerë një pronë, e cila mund të jetë apartament, tokë bujqësore, apo çdo lloj tjetër titulli pronësie që është i regjistruar në zyrat e Kadastrës dhe ka një kartelë dhe një certifikatë, kjo pronë apo titull pronësie mund të shitet dhe të blihet nga qytetarët, d.m.th. të qarkullojë. Atëherë në momentin kur qytetari bën kontratën dhe e mbyll këtë kontratë pranë një zyre noteriale, dhe kjo është shumë e rëndësishme sepse të gjitha kontratat bëhen pranë zyrave noteriale, që është e ligjëruar dhe e njohur nga legjislacioni shqiptar, duhet që brenda 30 ditëve kalendarike të aplikohet në zyrën e Kadastrës. Në rast se kalohet ky afat kohor, normalisht që penalizohet me një gjobë, e cila ka një vlerë gati 10% të tarifës që paguhet për mbylljen e kontratës në zyrën e Kadastrës.

Sa është afati kohor i mbylljes së kontratës?

30 ditë kalendarike për çdo kontratë që regjistrohet. Mbyllja e kontratës në zyrat e Kadastrës duhet të bëhet brenda 30 ditëve nga data e bërjes së kontratës në zyrën noteriale, me qëllim që qytetarët të mos penalizohen. Shuma e gjobës që duhet paguar pastaj nëse shkelet afati ligjor kohor i mbylljes së kontratës në zyrat e Kadastrës, arrin deri në 300.000 lekë të rinj.

Cilat kontrata penalizohen dhe sa është vlera e penalitetit?

Bëhet fjalë për të gjitha kontratat e shit-blerjes, aktet e dhurimit, vërtetimet e gjykatave që marrin vendime për pronat dhe vendimet që vijnë nga gjykatat dhe që janë tituj ekzekutivë për regjistrimin e një prone. Të gjitha këto dokumentet duhet që të regjistrohen brenda 30 ditëve kalendarike nga data e lëshimit të tyre. Këto janë kryesoret sepse janë kontrata përfundimtare, të cilat merren me çështjet e kalimit të pronësisë.

Çfarë dokumentesh duhen të paraqesin qytetarët pranë zyrave të Kadastrës?

Qytetarët mund të marrin udhëzimet e duhura edhe nga zyrat noteriale, kur bëjnë kontratat e tyre. Kur përpilohet akti i dhurimit ose kontrata, një kopje e mban zyra noteriale dhe dy kopje i merr qytetari, njërën prej të cilave e dorëzon në Kadastër. Të gjitha kopjet e dokumentit kanë të njëjtën vlerë, por dokumenti origjinal dorëzohet në zyrën e Kadastrës. Në momentin kur qytetari paraqitet në zyrën noteriale duhet që të ketë certifikatën e pronësisë, kartelën e pronësisë, kartën e identitetit, duhet të jenë të pranishëm gjithashtu edhe personat e tjerë nëse janë të shënuar në dokumentin e pronësisë. Gjithashtu duhet që të japë pëlqimin edhe bashkëshortja, pavarësisht se mund të mos e ketë emrin në dokumentin e pronësisë. Sipas informacioneve të fundit që kam, në të gjitha dokumentet e pronësisë ku është shënuar vetëm emri i bashkëshortit, tashmë do të shënohet edhe emri i bashkëshortes.

Për temën e sotme jemi bazuar në nenin 25. Do të shtoni diçka tjetër për të gjithë ata që janë të interesuar?

Çdo person, i cili është mbajtës i një titulli pronësie apo i një të drejte reale të detyrueshme sipas Kodit Civil apo i ligjit të veçantë, duhet që të paraqesë kërkesë për regjistrimin e titullit të pronësisë, brenda 30 ditëve të hyrjes në fuqi, pra nga marrja e dokumentit në zyrën noteriale duhet që të paraqitet menjëherë për regjistrimin e këtij dokumenti në zyrën e Kadastrës. Nëse kërkesa për regjistrim paraqitet tej afatit 30-ditor, përveç tarifës së regjistrimit, për çdo ditë vonese, kërkuesi duhet që të paguajë edhe një kamatë-vonesë të barabartë me 10% të tarifës së regjistrimit, por jo më shumë se 300.000 lekë të rinj. Penaliteti është shumë i rëndë, prandaj duhet patjetër që qytetarët e interesuar të zbatojnë afatin kohor të përcaktuar nga ligji për regjistrimin e kontratave pranë zyrave të Kadastrës. Pra, qytetarët që duan të bëjnë kalimet e titujve të pronësisë duhet patjjetër që të jenë të kujdesshëm dhe të ndjekin me përpikëri rregullat e përcaktuara nga neni 25, sepse është në interesin e tyre.

Pika 3 e nenit 25. Përjashtimi i regjistrimit të pasurive që trajtohen nga legjislacioni për çështjet e pronësisë. Drejtoria vendore zbaton procedurat e posaçme, të parashikuara në këtë ligj. Legjislacioni përkatës në aktet nënligjore në zbatimin e tyre.

Jam nga Tirana. Kam blerë shtëpi këtu në Tiranë, pas vitit 2000. Në dokument, si pronar është shënuar emri i bashkëshortit, ndërsa emri im nuk është shënuar. Bashkëshorti ndërroi jetë në muajin janar, pas 51 vitesh martese së bashku. Doja që të ktheja librezën e energjisë elektrike e të ujit në emrin tim sepse jetoj vetëm dhe jam pensioniste. Nuk munda t’i bëj sepse më thanë që nuk isha pronare.

Në qoftë se kjo pasuri është konsumuar brenda martesës, normalisht që zonja është bashkëpronare. Por, përveç zonjës, bashkëpronarë janë edhe fëmijët me pjesë të barabarta. Zonja duhet të shkojë te një zyrë noteriale dhe të bëjë aktin e trashëgimisë. Ata që i kanë thënë zonjës që nuk është pronare, janë gabuar. Sigurisht që ajo është bashkëpronare, por emri i saj nuk është shënuar në dokumentin e pronësisë, prandaj edhe zonja duhet të bëjë patjetër aktin e trashëgimisë, në mënyrë që të njihet me dokument si pronare e ligjshme.

Jam nga Kukësi. Dua të fus tokën bujqësore në tapi. E kam marrë me Ligjin nr. 7501. Si duhet të veproj?

Zotëria ka afat deri në datën 31 dhjetor 2019 që të plotësojë dokumentet për përfitimin e tokës bujqësore. Në qoftë se zotëria nuk e ka marrë aktin e marrjes së tokës në pronësi, duhet të shkojë pranë qendrës administrative, në zonën ku ai ndodhet, dhe të marrë këtë akt sipas ngastrave të tokës që ai përdor konkretisht në terren. Pastaj duhet të bëjë planet e rilevimit. Për këtë duhet që të marrë një specialist topograf nga një studio ligjore e licensuar ose nga qendra e tij administrative, nëse ajo e ka një specialist të tillë. Gjithashtu duhet që të paraqesë një certifikatë familjare, një vërtetim në qendrën administrative dhe pastaj të vazhdojë regjistrimin standard pranë zyrave të Kadastrës në Kukës. Por dokumentet kryesore e theksoj që duhet t’i plotësojë në qendrën administrative ku banon, sepse qendra administrative ka detyrimin ligjor për këto dokumente. Në qoftë se zotëria do të ketë pengesa apo kundërshtime, atëherë duhet të ndjekë rrugën tjetër, atë të procesit gjyqësor pranë Gjykatës së Shkallës së Parë në Kukës.

Kam tokën e gjyshit që nuk e kam marrë. Ligji nr. 7501 nuk më ka trajtuar me tokë. Si mund ta marr tani tokën? Faktikisht tokën ime është e lirë, nuk e ka marrë asnjë njeri tjetër sepse fshatarët e dinin se ajo tokë ishte e gjyshit dhe nuk morën tokë tek ajo. Pra nuk kam probleme të zënies së tokës. Jemi tre vëllezër dhe jami fare pa tokë. Si duhet të veprojmë?

Toka e gjyshit të zotërisë hyn në kategorinë e tokave të vjetra, të trashëguara. Kryesorja është që zotëria duhet të zotërojë dokumentin e pronësisë, të cilin mund ta gjejë në arkivin e qytetit ku zotëria banon ose në Arkivin e Shtetit në Tiranë. Pra kjo është kryesorja, që aai duhet të ketë dokumentin e origjinës së tokës. Pastaj duhet të konsultohet me një studio ligjore avokatie dhe të hapë një proces gjyqësor në Gjykatën e Shkallës së Parë të Rrethit sepse zyra që më parë merrej me çështjen e trajtimit të pronave të vjetra, tani merret vetëm me kompensimet, pasi në muajt mar-prill është mbyllur procedura. Zyra e trajtimit të pronave po u kthen qytetarëve edhe dosjet që kishte për shqyrtim dhe që nuk janë përpunuar. Tashmë do të veprohet vetëm me anën e gjykatave. Pra, zotëri duhet menjëherë të lidhet me një zyrë avokatie dhe të fillojë procesin gjyqësor në gjykatë, në mënyrë që t’i njihet prona e gjyshit.

B.K./b.ha./Shqiptarja.com

TAG:
• kontrata
• regjistrimi i banesave