POP 5

Lajmet më të lexuara të 5 minutave të fundit

Kronikë

Skandali! Ashensori që u rrëzua në QSUT nuk ishte i regjistruar! Në Shqipëri vetëm 1429 të certifikuar nga ISHMT

Një ditë pas rrëzimit të ashensorit në QSUT, Inspektorati Shtetëror i Mbikëqyrjes së Tregut zbulon se ai ishte i paregjistruar, edhe pse kompania Sulollari Klima kishte fituar një tender rreth 120 mijë euro për mirëmbajtjen e ashensorëve në Qendrën Spitalore. Në Shqipëri, sipas inspektoratit janë vetëm 1429 ashensorë të regjistruar sipas ligjit, shifër që flet për një situatë totalisht të pasigurt për jetën e qytetarëve që i përdorin.

TIRANË- Me fitimin e një tenderi mbi  14 milionë e 500 mijë lekë (të rinj) me TVSH, firma “Sulollari Klima” nuk ka menduar për jetën e pacientëve në QSUT. Kompania që duhej jo vetëm të mirëmbante ashensorët në Qendrën Spitalore Universitare, por edhe të sigurohej që të ishin të sigurt për njerëzit, nuk e kishte regjistruar ashensorin pranë Inspektoratit Shtetëror të Mbikëqyrjes së Tregut.

Këtë fakt e bën të ditur vetë Inspektorati një ditë pas aksidentit të rëndë mre rrëzimin e një prej  4 ashensorëve në Urgjencën e Sëmundjeve të Brendshme në QSUT, që la të plagosur një paciente 80-vjeçare që ndodhej brenda bashkë me barrelistin. Nga inspektimi që ISHMT ka bërë, rezulton se ashensorit i është bërë vetëm ekzaminimi fillestar nga një organ i miratuar, por nuk është bërë regjistrimi i tij pranë Inspektoratit.

Në bazë të ligjit “Për tregtimin dhe mbikëqyrjen e tregut të produkteve joushqimore’, personi Përgjegjës për ashensorin ka për detyrë të kontraktojë një organ të miratuar, i cili bën kontrollin fillestar të ashensorit dhe atë periodik, për të vlerësuar nëse ashensori është në përputhje me rregullat teknike për të garantuar sigurinë e përdoruesve. Pas kryerjes së ekzaminimit fillestar personi përgjegjës ka detyrimin për regjistrimin e ashensorit pranë ISHMT-së.

Por kjo nuk ka ndodhur! ISHMT bën publik se pranë këtij inspektorati janë të regjistruar 1429 ashensorë dhe vetëm gjatë vitit 2021 janë bërë 336 inspektime.

Kjo shifër e ulët, vetëm 1429, tregon se shumica e kompanive të ashensorëve në Shqipëri nuk kanë zbatuar ligjin dhe nuk kanë bërë regjistrimin pranë ISHMT, duke shmangur kështu kontrollet periodike dhe ndëshkimet në rastet e konstatimit të shkeljeve teknike.

Ashensori në Urgjencën e QSUT pësoi defekt gjatë mbrëmjes të së dielës. Një nga kavot u këput dhe ashensori që ishte në ngjitje, u rrëzua në katin -1, duke bërë që një pjesë e barrelës ku ishte shtrirë pacientja, të përfundojë e varur jashtë ashensorit. Policia vuri në hetim në gjendje të lire, Ermal Brajën, teknikun për mirëmbajtjen e ashensorit dhe administratorin e firmës që ka fituar tenderin, “Sulollari Klima” Ardian Sulollari.  Data e lidhjes së kontratës me afat 24 muaj është 31 dhjetor 2021 me vlerë 2 milionë e 406 mijë e 270 lekë me TVSH. Nga ekstrakti në QKB, kompania “Sulollari Klima” thotë se është e specializuar për kondicionerë e kaldaja, ashensorë etj.

Një ditë më parë Report Tv mundi të hyjë brenda Urgjencës së Sëmundjeve të Brendshme dhe të konstatojë ashensorin e dëmtuar, tashmë jashtë funksionit. Shiritat e policisë janë hequr, ndërsa ashensorët e tjerë janë në punë siç konstatohet lehtësisht nga butonat e ndezur. Nëse edhe ashensorët e tjerë nuk janë regjistruar pranë ISHMT-së, edhe ata mbeten rrezik për jetën e personave, njëjtë si i pari që pësoi defekt. Hetimet vijojnë.

Njoftimi i plotë i ISHMT
Lidhur me ngjarjen e ndodhur në QSUT, ku si pasojë e një problemi në funksionimin e ashensorit janë plagosur dy persona, Inspektoriati Shtetëror i Mbikëqyrjes së Tregut, në bashkëpunim me strukturat e tjera ligj zbatuese, është angazhuar maksimalisht për zbardhjen e ngjarjes, përcaktimin e shkaqeve dhe marrjen e masave me qëllim mos përsëritjen e ngjarjeve të tilla, të cilat cënojnë sigurinë e qytetarëve.

Paraprakisht dëshirojmë të informojmë se, në bazë të inspektimit të kryer nga ISHMT, rezulton se është kryer ekzaminimi fillestar i ashensorit nga një organ i miratuar, por nuk është kryer regjistrimi i ashensorëve në zbatim të Ligjit 10489/2011 “Për tregtimin dhe mbikëqyrjen e tregut të produkteve joushqimore’, i ndryshuar.

Në bazë të ligjit, Personi Përgjegjës i produkt/instalimit ka për detyrë të kontraktojë një Organ të Miratuar, i cili bën kontrollin fillestar të ashensorit dhe atë periodik, për të vlerësuar nëse ashensori është në përputhje me rregullat teknike për të garantuar sigurinë e përdoruesve. Pas kryerjes së ekzaminimit fillestar personi përgjegjës ka detyrimin për regjistrimin e ashensorit pranë ISHMT-së.

Kontrollet për sigurinë e ashensorëve kanë qenë një ndër prioritetet e veprimtarisë së Inspektoriatit të Mbikëqyrjes së Tregut, ku vetëm për vitin 2021 janë kryer 336 inspektime, ndërkohë që numri i ashensorëve të regjistruar pranë ISHMT është 1429.

Gjithashtu, ISHMT ka informuar në mënyrë të vazhdueshme të gjitha grupet e interesit mbi detyrimet ligjore që duhet të përmbushen lidhur me sigurinë e ashensorëve.

ISHMT iu bën thirrje të gjithë personave përgjegjës të kryejnë procedurën e regjistrimit të ashensorëve pranë këtij institucioni, ashensorët e rinj që instalohen për herë të parë, por edhe ashensorët që janë në përdorim, në mënyrë që të garantohet që ashensorët në përdorim për të tretët apo publikun e gjerë të jetë në përputhje me kërkesat e sigurisë së produktit/instalimit të vënë në shërbim gjatë gjithë periudhës së tij të përdorimit. 

B.K./Sh.Sh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    26 Dhjetor, 08:05

    Si ka qenë për ju viti 2024?

Lajme të tjera



×

Lajmi i fundit

Dosja 5D, SPAK mbyll hetimet dhe dërgon për gjykim ish-drejtorët e Bashkisë Tiranë

Dosja 5D, SPAK mbyll hetimet dhe dërgon për gjykim ish-drejtorët e Bashkisë Tiranë

26 Dhjetor, 15:36