Reportazh/ Magjia e ekranit të kinemasë në Pogradec! Shfaqen 44 filma, prodhimet më të mira të viteve të fundit! ‘Gilgamesh’ triumfon në ‘Festivalin e Filmit Ballkanik’

Producentë, regjisorë dhe studentë të kinematografisë morën pjesë në Festivalin Ballkanik të Filmit dhe Kulinarisë. Në ekranin e madh u shfaqën 44 filma konkurues por dhe filma të Arkivës së Filmit “Përrallë nga e kaluara” dhe “Gjeneral Gramafoni”, tashmë të restauruar.  Eno Milkani u kujdes që ky kompeticion të jetë i paharrueshëm në Pogradec, aty ku e kishte nisur 14 vite më parë me Gerta Qurkun dhe publicistin e ndjerë Fatos Baxhaku. Kineasti thekson se prodhimtaria ka hyrë në rrugën e duhur, ku shumë filma sot po prodhohen në mënyrë të pavarur.

“Filmat e gjatë ishin shumë të mirë, ku përmendim "Okarina", "Sofia" dhe dy filma rumunë”, shprehet Eno Milkani kineast dhe organizator i festivalit.

"Quhet festival ballkanik por në fakt sjell më shumë Europë këtu në Pogradec”, thekson drejtori i Qendrës Kombëtare të Kinematografisë, Eol Çashku.

Ky festival krahas filmave shërbeu si promotor i turizmit, natyrës dhe kulinarisë.

“Përpos se shohin filma diskutojnë për projektet e reja dhe promovojmë turizmin”, tha Gerta Qurku, producente dhe njëresh organizatore e festivalit.

Gjatë netëve të festivalit u promovua libri i “Serafin Fanku- Felini i tetarit shqiptar”, i autorit Stefan Capaliku. Sakaq, Piro Milkani, regjisor i njohur kujton vitet e punës me Fankun dhe e vlerëson atë si "themelues i teatrit të Shkodrës”.

44 filma me metrazh të gjatë e të shkurtër, të producentëve nga Shqipëria, Kosova, Maqedonia e Veriut, Kroacia, Bullgaria, Rumania, Serbia, Greqia dhe Turqia u bënë pjesë e edicionit të 14-të festivalit, mes tyre “Horia” me të cilën përfaqësohet Rumania dhe “Okarina” i Kosovës.

 “Mesazhi që unë dua të shpreh është njësoj si në film: Besoji intuitës!”, tha aktori protagonist i filmit "Horia", Vladimir Teca .

“‘Okarina’ është një film rreth familjes, trashëgimisë dhe disa situatave të vështira ...", u shpreh drejtori i fotografisë së filmit "Okaria", Aleks Blum.

Festivali u ndoq me interes nga publiku dhe mbrëmjen e 29 qershorit, juria ndau çmimet, ku triumfoi “Gilgamesh”. Nje film i animuar me metrazh të shkurtër, i regjisorit shqiptar Shaqir Veseli.

ÇMIMET E EDICIONIT 14-të TË 'BALKAN FILM FOOD FESTIVAL'

Best Feature Film Award: -Behind the Haystacks - Drejtore Asimina Proedrou - Greqi

"Fatos Baxhaku" Award: "Gilgamesh"- Drejtor, Shaqir Veseli, Shqipëri

Best Student Film Award: "Greenhouse"- Drejtor George Georgakopoulos, Greqi

Pogradeci Lake Award:  “Warboy” - Drejtor Marian Crisan, Rumani

Balkan Spirit Award: “To Beflower Marble” – Drejtor Sara Stijović, Mali i Zi

Jury Special Mentions:

-Between the edges of the Day – Drejtor- Andreea Elena Lăcătuș, Rumani

-Goodnight Lilly – Drejtor  Peter Vulchev, Bullgari

R.D/Shqiptarja.com

TAG:
• eno milkani
• Eol Çashku
• gerta qurku
• pogradec
• festivali ballkanik i filmit
• balkan film food festival