Rikonstruktohen shkollat e mesme në Librazhd, Balla: Objektiv monitorimi me kamera

Shkolla e mesme e Hotolisht në Librazhd do t’i shtohet rrjetit të shkollave tërësisht të rikonstruktuara, pasi prej shumë vitesh godina ishte e degraduar. Kryetari i Grupit Parlamentar të Partisë Socialiste, Taulant Balla së bashku me Kryetarin e Bashkisë Kastriot Gurra inspektuan ecurinë e punimeve. Në fjalën e tij Balla tha se janë disa shkolla në Bashkinë Librazhd që së shpejti do të rikonstruktohen.

“Kemi marrë besimin e njerëzve për të bërë punë dhe vëmendja jonë është për njerëzit, prandaj investimet në infrastrukturën shkollore janë të rëndësishme për ne. Investojmë këtë vit në dy prej shkollave më të rëndësishme, shkolla e Hotolishtit dhe në shkollën e mesme të fshatit Zgosht, Njësia Administrative Lunik.

Vitin e ardhshëm është parashikuar ndërhyrje tërësore në shkollën e mesme të qytetit të Librazhdit. Në këtë mënyrë përmbyllim fazën e parë të investimeve në infrastrukturën shkollore në Bashkinë Librazhd.

Projekti dhe standardet që po zbatohen janë të njëjta me ato që po zbatohen edhe në qendër të Tiranës apo edhe në pjesë të tjera të Shqipërisë. Pra, projekti i rikonstruksionit përfshin ngrohjen, palestrën, të gjitha ambientet e brendshme dhe të jashtme. Më pas në bashkëpunim edhe me donatorët synojmë që të shtrijmë monitorimin me kamera në të gjitha shkollat”, - deklaroi Balla.

Ndërsa kryebashkiaku i Librazhdit, Gurra në fjalën e tij theksoi se nevoja për rikonstruksion total erdhi jo vetëm si pasojë e plotësimit të standardeve, por edhe të degradimit për shkak të lënies pas dore, vite me radhë.

TAG:
• taulant balla
• kastriot gurra
• librazhd
• shkolla