Rilindja urbane, Gjermeni: Nga
sheshet qendrore drejt lagjeve

Moti i keq nuk e ka penguar Bashkinë e Gramshit të vijojë punën për zbatimin e projektit të pestë,  të financuar nga Fondi i Zhvillimit të Rajoneve: Rehabilitimi i bllokut të banimit në lagjen “Sporti 2”, me vlerë 65 milionë lekë.
 
Ministrja e Zhvillimit Urban, Eglantina Gjermeni dhe kryetarja e Bashkisë së Gramshit, Luljeta Dollani, inspektuan punimet, që konsistojnë në rikonstruksionin e fasadave të të gjithë pallateve të bllokut të banimit, rehabilitimin e ujësjellësit dhe ndërtimin e hapësirave sportive dhe atyre shlodhëse.
 
Janë mbi 6 mijë banorë përfitues të këtij projekti. Ministrja Gjermeni deklaroi gjatë inspektimit, se, programi “Rilindja Urbane” krahas qendrave urbane, tanimë po shtrihet edhe në lagjet e qyteteve apo në rrugët rurale.
 
“Rilindja Urbane nuk ka lënë cep të Shqipërisë pa ndaluar, duke financuar jo vetëm sheshet dhe qendrat urbane, por edhe në blloqe banimi apo rrugë rurale që lidhin qytetet me fshatrat. Një prej tyre është edhe ky bllok banimi.
 
Projektet do të vijojnë edhe për vitin që vjen duke mbështetur projektet prioritare të secilës bashki”, tha Ministrja.
 
Bashkia Gramsh për periudhën 2014 – 2016 ka përfituar në total 129,792,393 milionë lekë për zbatimin e 5 projekteve të infrastrukturës urbane. Katër prej tyre, mes të cilëve rikonstruksioni i sheshit qendror, kanë përfunduar.
 
29 miliardë lekë është fondi i investuar për periudhën 2014 – 2016 për zbatimin e 328 projekteve të infrastrukturës vendore.


d.b/shqiptarja.com