Katër militantët e Sali Berishës, të arrestuar pas protestës së dhunshme të mbajtur më 28 shkurt, janë liruar nga qelia ndërsa gjykata iu ka caktuar masën “detyrim paraqitje”. Leonardo Marku, Robespier Dervishaj, Doris Rista dhe Sergei Rapo, janë 4 protestuesit, të cilët janë lënë të lirë me vendim të gjyqtares Lorena Çabej.

Në protestën e 28 shkurtit mbizotëroi kaosi dhe dhuna, ku militantët e Berishës sulmuan me molotovë vilën e ish-diktatorit Enver Hoxha (brenda së cilës ndodheshin 10 artistë dhe disa pjesëtarë të stafit), bizneset private dhe koshat e mbeturinave.

Po ashtu pati edhe përplasje mes militantëve dhe Policisë, përkatësisht përballë Drejtorisë së Përgjithshme të Policisë dhe në zonën e ish-Bllokut, ku efektivët u goditën me gurë dhe sende të forta.

Në protestën e 28 shkurtit, ndryshe nga tubimet e organizuara herë të tjera, nuk kishte fjalime politike në podium, por u zhvillua një marshim në zona të ndryshme të Tiranës dhe në një moment kur po mendohej se gjithçka po shkonte më qetë se herët e kaluara, militantët e Berishës zbrazën breshëri molotovësh e fishekzjarrësh te vila e Enver Hoxhës.

Kujtojmë se protestat fundit të organizuara nga Berisha janë kthyer në një rutinë ku përdoret dhunë dhe goditen me molotovë dhe sende të forta efektivët e Policisë, por edhe institucionet dhe prona private.